ចំហេះព្រៃនៅខេត្តឆ្នេរសមុទ្រ Izmir ភាគខាងលិចប្រទេសទួរគី ដែលមានខ្យល់បក់ខ្លាំង បានធ្វើឱ្យលំនៅឋាន និងអាជីវកម្មជាច្រើនកន្លែង ត្រូវបានឆេះបំផ្លាញ ហើយបានបង្ខំឱ្យមនុស្សមួយចំនួន ត្រូវជម្លៀសខ្លួនចេញ។ 

រថយន្តគិលានសង្គ្រោះ អាចត្រូវបានគេឃើញទៅដល់តំបន់លំនៅឋាន កាលពីថ្ងៃសុក្រ ទី១៦ សីហា ខណៈអគ្គិភ័យបានឆាបឆេះរាលដាលខ្លាំង។

អគ្គិភ័យនៅខេត្ត Izmir បានចាប់ផ្តើមកាលពីយប់ថ្ងៃព្រហស្បតិ៍ ទី១៥ សីហា នៅក្នុងស្រុក Karsiyaka ដោយមិនទាន់ដឹងមូលហេតុ ខណៈក្រុមអ្នកពន្លត់អគ្គិភ័យ បានធ្វើការរួចហើយដើម្បីទប់ស្កាត់អគ្គិភ័យចំនួនបីកន្លែងដាច់ដោយឡែកពីគ្នា នៅភាគពាយព្យប្រទេសទួរគី។

ក្រុមអ្នកពន្លត់អគ្គិភ័យ ក៏បានព្យាយាមទប់ស្កាត់ចំហេះព្រៃផ្សេងទៀត នៅភាគខាងជើងផងដែរ។

អភិបាលខេត្ត Izmir លោក Suleyman Elban បាននិយាយថា អគ្គិភ័យនៅក្រុង Karsiyaka បានបន្តនៅតំបន់ចន្លោះពី ៤ ទៅ ៥ តំបន់ផ្សេងគ្នា ទោះបីជាមានការខិតខំប្រឹងប្រែងដើម្បីទប់ស្កាត់អគ្គិភ័យ ដោយប្រើប្រាស់យន្តហោះ ឧទ្ធម្ភាគចក្រ និងរថយន្តពន្លត់អគ្គិភ័យផ្សេងទៀតក៏ដោយ ហើយប្រជាជននៅក្នុងភូមិមួយ ត្រូវបានជម្លៀសចេញ។

តំបន់ឆ្នេរនៃប្រទេសទួរគី ក្នុងរយៈពេលប៉ុន្មានឆ្នាំចុងក្រោយនេះ ត្រូវបានបំផ្លាញដោយចំហេះព្រៃ ខណៈរដូវក្តៅកាន់តែក្តៅឡើង និងស្ងួតជាងមុន ដែលអ្នកវិទ្យាសាស្ត្រនិយាយថា ទាក់ទងទៅនឹងបម្រែបម្រួលអាកាសធាតុ។