ក្រសួងការបរទេសអាមេរិកបានឲ្យដឹងថា មន្ត្រីសហរដ្ឋអាមេរិកបានជួបតាមរយៈអនឡាញជាមួយសមាជិកនៃចលនាប្រឆាំងរបស់សហភាពមីយ៉ាន់ម៉ា កាលពីថ្ងៃសុក្រ (ទី១៦ ខែសីហា) ហើយបានសន្យាថា នឹងគាំទ្របន្ថែមទៀតដោយផ្ទាល់ ដើម្បីជួយដល់ដំណើរការផ្លាស់ប្តូទៅជារដ្ឋាភិបាលស៊ីវិល និងយល់ស្របលើតម្រូវការ ដើម្បីបន្តដាក់សម្ពាធលើរបបយោធា។

គួរបញ្ជាក់ថា ព័ត៌មាននៃកិច្ចប្រជុំនេះបានកើតឡើងបន្ទាប់ពីគូប្រជែងក្នុងតំបន់របស់ទីក្រុងវ៉ាស៊ីនតោន គឺប្រទេសចិន បានជំរុញឲ្យបណ្ដាប្រទេសជិតខាងជួយដល់សហភាពមីយ៉ាន់ម៉ាដែលហែកហួរដោយសង្គ្រាមពន្លឿនដំណើរការសន្តិភាព និងការផ្សះផ្សារបស់ខ្លួន នៅពេលដែលរដ្ឋមន្ត្រីការបរទេសរបស់ប្រទេសមហាអំណាចសេដ្ឋកិច្ចទី២ របស់ពិភពលោកមួយនេះ ជួបជាមួយសមភាគីឡាវ មីយ៉ាន់ម៉ា និងថៃ។

សេចក្តីថ្លែងការណ៍របស់សហរដ្ឋអាមេរិក បានឲ្យដឹងថា កិច្ចប្រជុំកាលពីថ្ងៃទី១៦ ខែសីហា មានពាក់ព័ន្ធនឹងទីប្រឹក្សាក្រសួងការបរទេសលោក Tom Sullivan និងជំនួយការអ្នកគ្រប់គ្រងទីភ្នាក់ងារ USAID លោក Michael Schiffer ជាមួយសមាជិកឈានមុខគេនៃរដ្ឋាភិបាលរួបរួមជាតិគាំទ្រលទ្ធិប្រជាធិបតេយ្យរបស់ប្រទេសមីយ៉ាន់ម៉ា ក្រុមប្រឹក្សាប្រឹក្សាឯកភាពជាតិ និងក្រុមតស៊ូសំខាន់ៗ សហភាពជាតិ Karen គណបក្សជាតិជឿនលឿន Karen ហើយនិងរណសិរ្សជាតិ Chin។

ប្រព័ន្ធផ្សព្វផ្សាយរដ្ឋមីយ៉ាន់ម៉ា កាលពីថ្ងៃទី១៥ ខែសីហា បានរាយការណ៍ថា ប្រទេសចិនបានសន្យាថា នឹងជួយគាំទ្រផ្នែកបច្ចេកទេស ដើម្បីធ្វើជំរឿន បន្ទាប់មកជួយដល់ការបោះឆ្នោត ដែលជាសញ្ញាបង្ហាញពីការគាំទ្ររបស់ទីក្រុងប៉េកាំង ចំពោះរបបយោធាដែលកំពុងជួបការលំបាកដោយការបះបោរប្រដាប់អាវុធ និងការបាត់បង់ដែនដីជាបន្តបន្ទាប់។

សហភាពមីយ៉ាន់ម៉ា បានស្ថិតក្នុងភាពចលាចលចាប់តាំងពីឆ្នាំ២០២១ មកម៉្លេះ នៅពេលដែលយោធាបានទម្លាក់រដ្ឋាភិបាលស៊ីវិលជាប់ឆ្នោត តាមរយៈរដ្ឋប្រហារ ដោយបានបញ្ចប់ភ្លាមៗនូវជំហានមិនទាន់ប្រាកដប្រជារបស់ប្រទេសក្រីក្រមួយនេះ ក្នុងការបោះឆ្ពោះទៅរកលទ្ធិប្រជាធិបតេយ្យពេញលេញ៕