ស៊ីហ្គេម៖ សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាបានបង្ហើបថា កម្ពុជាបានដាក់នូវបេក្ខភាពធ្វើម្ចាស់ផ្ទះការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ បន្ទាប់ពីសម្ដេចបានចាប់ផ្ដើមធ្វើទំនាក់ទំនងល្អជាមួយដៃគូដែលជឿទុកចិត្តគ្នា ក្នុងក្របខណ្ឌនៃទំនាក់ទំនងយុទ្ធសាស្ត្រគ្រប់ជ្រុងជ្រោយកម្ពុជា-ចិន និងទទួលបានភ្លើងខៀវពីមិត្តចិន ក្នុងការផ្ដល់វិភាគទានសាងសង់ហេដ្ឋារចនាសម្ព័ន្ធកីឡាសំខាន់ៗ ដើម្បីរៀបចំព្រឹត្តិការណ៍ប្រចាំតំបន់ ២ឆ្នាំម្ដងនេះ។
សម្ដេចតេជោនាយករដ្ឋមន្ដ្រីបានមានប្រសាសន៍បែបនេះ បន្ទាប់ពីសម្ដេច និងឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រគល់ និងទទួលវិមានកីឡដ្ឋាននៃពហុកីឡដ្ឋានជាតិមរតកតេជោ កាលពីល្ងាចថ្ងៃទី១២ ខែកញ្ញា ឆ្នាំ២០២១ ដែលត្រូវនឹងថ្ងៃកម្ពុជាសល់រយៈពេល ៦០០ថ្ងៃគត់ នៃដំណើរឆ្ពោះទៅរកពិធីបើកផ្លូវការការប្រកួតកីឡាស៊ីហ្គេមលើកទី៣២ នាថ្ងៃទី០៥ ខែឧសភា ឆ្នាំ២០២៣។ សម្ដេចតេជោ ហ៊ុន សែន បានបញ្ជាក់ថា សមិទ្ធផលដ៏អស្ចារ្យនេះ បានកើតឡើងពីការខិតខំប្រឹងប្រែងក្នុងទំនាក់ទំនងដែកថែប រវាងកម្ពុជា និងចិន ពិសេសក្រោមគំនិតផ្ដួចផ្ដើមផ្ទាល់របស់សម្ដេចតេជោនាយករដ្ឋមន្ដ្រី និងឯកឧត្ដម ស៊ី ជីង ពីង ប្រធានាធិបតីសាធារណរដ្ឋប្រជាមានិតចិន ដែលនាំឲ្យកម្ពុជាមានលទ្ធភាពក្នុងការដាក់បេក្ខភាពរៀបចំការប្រកួតស៊ីហ្គេម និងអាស៊ានប៉ារ៉ាហ្គេមនៅឆ្នាំ២០២៣ តាមរយៈសមិទ្ធផលមិននឹកស្មានដល់ដែលបានបង្ហាញវត្តមាននៅកម្ពុជាពេលនេះ។
សម្ដេចតេជោនាយករដ្ឋមន្ដ្រីបានបន្ថែមថា នេះគ្រាន់តែជាពិធីប្រគល់ និងទទួល ប៉ុន្ដែក្រោយស្ងប់ស្ងាត់កូវីដ សម្ដេចនឹងរៀបចំនូវពិធីសម្ពោធដាក់ឲ្យប្រើប្រាស់ជាផ្លូវការទ្រង់ទ្រាយធំមួយទៀត ក្រោមអធិបតិភាពសម្ដេចផ្ទាល់ និងរំពឹងមានថ្នាក់ដឹកនាំជាន់ខ្ពស់ចិនចូលរួមផងដែរ ពិសេសនឹងអនុញ្ញាតឲ្យមានអ្នកចូលរួមពេញពហុកីឡដ្ឋានជាតិមរតកតេជោ ដើម្បីអបអរសាទរ និងបង្ហាញឲ្យប្រជាពលរដ្ឋមើលឃើញនូវសមិទ្ធផលទាំងឡាយ ដែលសម្រេចបានតាមរយៈកិច្ចសហប្រតិបត្តិការផ្លែផ្ការវាងកម្ពុជា និងចិន។ ទន្ទឹមជាមួយគ្នា ឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្ដ្រីការបរទេសចិន បានសម្ដែងការអបអរសាទរចំពោះសមិទ្ធផល និងជាចំណងដៃប្រវត្តិសាស្ដ្ររបស់រដ្ឋាភិបាលចិន ចំពោះប្រទេស និងប្រជាជនកម្ពុជា ដោយឯកឧត្តមរំពឹងថា តាមរយៈសមិទ្ធផលដែលជាជំនួយឥតសំណងដ៏ធំជាងគេនៅទ្វីបអាស៊ីនេះ នឹងជួយជំរុញវិស័យកីឡាកម្ពុជាឲ្យកាន់តែរីកចម្រើន ពិសេសជួយឲ្យកម្ពុជាដណ្ដើមបានមេដាយកាន់តែច្រើន ក្នុងនាមម្ចាស់ផ្ទះស៊ីហ្គេម និងអាស៊ានប៉ារ៉ាហ្គេមឆ្នាំ២០២៣។
ក្រោយការថ្លែងសុន្ទរកថា សម្ដេចតេជោ ហ៊ុន សែន និងឯកឧត្តម វ៉ាង យី ក៏បានផ្ដល់វត្តមានធ្វើជាសាក្សីក្នុងការចុះហត្ថលេខាប្រគល់ និងទទួលវិមានកីឡដ្ឋាននៃពហុកីឡដ្ឋានជាតិមរតកតេជោ ដែលតំណាងដោយមន្ដ្រីជាន់ខ្ពស់ប្រទេសទាំងពីរ ក្នុងនោះកម្ពុជាតំណាងដោយឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា និងជាប្រធានគណៈកម្មការបច្ចេកទេស សម្រាប់គម្រោងសាងសង់ពហុកីឡដ្ឋានជាតិមរតកតេជោ និងភាគីចិនតំណាងដោយឯកឧត្តម ឈាន ខឺមីង អនុរដ្ឋមន្ដ្រីក្រសួងពាណិជ្ជកម្មចិន។ គួរដឹងថា វិមានកីឡា ឬកីឡដ្ឋានធំនៃពហុកីឡដ្ឋានជាតិមរតកតេជោ បានបើកការដ្ឋានសាងសង់ផ្លូវការកាលពីថ្ងៃទី០៤ ខែមេសា ឆ្នាំ២០១៧ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋមន្ដ្រី ដោយសាងសង់លើផ្ទៃដីប្រមាណ ១៦.៤ហិកតា ទំហំសំណង់ប្រហែល ៨៦,០០០ម៉ែត្រការ៉េ និងចំណាយថវិកាប្រមាណ ១៥០លានដុល្លារ។ កីឡដ្ឋានដ៏ទំនើបនេះអាចផ្ទុកអ្នកទស្សនាបាន ៦ម៉ឺននាក់ ហើយមានសមត្ថភាពទទួលរៀបចំព្រឹត្តិការណ៍ប្រកួតកីឡាថ្នាក់ជាតិ និងអន្តរជាតិធំៗ ពិសេសត្រៀមរៀបចំពិធីបើក-បិទ និងប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
