ក្រុមបាតុករបានប្រមូលផ្តុំគ្នា ដើម្បីធ្វើបាតុកម្មបង្ហាញសាមគ្គីភាពជាមួយអ្នកសាសានាហិណ្ឌូ ដែលជាជនជាតិបង់ក្លាដែស បានប៉ះទង្គិចជាមួយបុគ្គលិកនគរបាល នៅទីក្រុង Nashik ភាគខាងលិចប្រទេសឥណ្ឌា កាលពីថ្ងៃសុក្រ (ទី១៦ ខែសីហា)។

សេចក្ដីរាយការណ៍ពីការណ៍ប្រព័ន្ធផ្សព្វផ្សាយ បានឲ្យដឹងថា បណ្ដាសមាគមអ្នកកាន់សាសនាហិណ្ឌូ បានអំពាវនាវឲ្យមានបម្រាមគោចរ ដើម្បីតវ៉ាប្រឆាំងនឹងការវាយប្រហារលើអ្នកកាន់សាសនាហិណ្ឌូ នៅប្រទេសបង់ក្លាដែសដែលរងគ្រោះយ៉ាងធ្ងន់ធ្ងរដោយជម្លោះ ប៉ុន្តែស្ថានការណ៍វិវត្តកាន់តែអាក្រក់ទៅៗ នៅពេលដែលក្រុមទាំង២ បានឈានដល់ការប៉ះទង្គិចគ្នាដោយហិង្សា។

នគរបាលបានប្រើប្រាស់គ្រាប់បែកឧស្ម័នបង្ហូរទឹកភ្នែក និងដំបង ដើម្បីបំបែកក្រុមបាតុករ ខណៈក្រុមអ្នកតវ៉ាទាំងនោះបន្តគប់ដុំថ្ម។ នគរបាលក្នុងតំបន់បានចាប់ខ្លួនមនុស្ស ១៥នាក់ បន្ទាប់ពីមាននូវការស៊ើបអង្កេតដំបូង ហើយបានចេញស្វែងរកជនល្មើសបន្ថែមទៀត បន្ទាប់ពីពិនិត្យមើលវីដេអូនៃអំពើហិង្សា។

គួរបញ្ជាក់ថា អ្នកកាន់សាសនាហិណ្ឌូដែលមានប្រហែល ៨ភាគរយនៃប្រជាជនបង់ក្លាដែសចំនួន ១៧០លាននាក់ ជាប្រពៃណី បានគាំទ្រគណបក្ស Awami League របស់អតីតនាយករដ្ឋមន្ត្រី លោកស្រី Sheikh Hasina ដែលបានបង្កឲ្យមានកំហឹងរបស់ប្រជាជន បន្ទាប់ពីការប៉ះទង្គិចគ្នា ដោយហិង្សា រវាងអ្នកតវ៉ាប្រឆាំងកូតាការងាររបស់រដ្ឋាភិបាល និងកងកម្លាំងសន្តិសុខ កាលពីខែមុន៕