មន្ត្រីថ្នាក់ដឹកនាំនៃក្រសួងសុខាភិបាល លោកគ្រូ ពេទ្យអ្នកគ្រូពេទ្យមកពីមន្ទីរពេទ្យទូទាំងរាជធានីខេត្តរួមទាំងនិស្សិតពេទ្យប្រមាណ 200 នាក់បានជួបជុំគ្នាប្រារព្វទិវាសល្យសាស្ត្រសម្ពព និងរោគស្ត្រីលើកទី ២ក្រោមប្រធានបទ ពង្រឹងគុណភាពក្នុងការថែទាំព្យាបាល និងសង្គ្រោះដោយផ្តោតលើប្រជា ពលរដ្ឋ។ទិវានេះមានការចូលរួមដោយផ្ទាល់និងតាមប្រពន្ធ័ហ្សូម (zoom)នាថ្ងៃទី១៦ ខែសីហា ឆ្នាំ២០២៤នេះ នៅមជ្ឈមណ្ឌលជាតិគាំពារមាតា និងទារក ក្នុងរាជធានីភ្នំពេញ ។

   លោកស្រីវេជ្ជបណ្ឌិត គឹម រត្ន័នា នាយកមជ្ឈមណ្ឌលជាតិគាំពារមាតា និងទារកបានថ្លែងថា ឆ្នាំនេះ ជាឆ្នាំទី២ ហើយដែលមជ្ឈមណ្ឌលជាតិបានរៀបចំទិវាសល្យសាស្ត្រ សម្ភព និងរោគស្ត្រី ក្នុងគោលបំណងៈ (១) ចែករំលែកនូវបទពិសោធ ក្នុងការថែទាំព្យាបាល និងសង្គ្រោះមាតា និងទារកដើម្បីកាត់បន្ថយនូវហានិភ័យនានា និង អត្រាមរណៈភាពដែលអាចបង្ការបាន។ (២)បង្ហាញរបកគំហើញថ្មីៗនៃការព្យា បាលដើម្បីបង្កើនគុណភាពនៃការផ្តល់សេវាសុខ ភាព។ (៣)ពិភាក្សាអំពីការអនុវត្តនៃការថែទាំ និងព្យាបាលដែលមានសុវត្ថិភាព។ ដោយឡែកប្រធានបទដែលលើក យកមកបង្ហាញ និងពិភាក្សាក្នុងរយៈពេល១ថ្ងៃនេះ គឺពាក់ ព័ន្ធនឹង១) ការព្យាបាលជំងឺ ការវះកាត់ ដែលទាក់ទងនឹង សម្ភព-រោគស្ត្រី ២)សម្ភព និងសង្គ្រោះបន្ទាន់ ៣) ការធ្វើរោគវិនិច្ឆ័យរកភាពមិនប្រក្រតីអំឡុងពេលមានផ្ទៃពោះ ៤) ការថែទាំម្តាយក្រោយសម្រាល (ការធ្វើSreening រកភាពមិនប្រក្រតី ការព្យាបាលបញ្ហាទំនាក់ទំនង ពិបាកភាសា និងបញ្ហាលេប អាហារជាដើម)។ 

   ថ្លែងក្នុងឱកាសនេះដែរ ឯកឧត្តម យូ ពិសី អនុរដ្ឋលេខាធិការក្រសួងសុខភិបាលតំណាងឯកឧត្តមសាស្ត្រាចារ្យ ហ៊ុន ចំរើន ប្រធានក្រុមប្រឹក្សាភិបាលនៃមជ្ឈមណ្ឌលជាតិគាំពារមាតា និងទារកបានប្រសាសន៍ថា ទិវានេះរៀបចំឡើង ស្របទៅនឹងផែនការយុទ្ធសាស្ត្ររបស់ក្រសួងសុខាភិបាល និងរាជរដ្ឋាភិបាលនីតិកាលទី៧ ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី គឺ ការកសាងនូវមូលធនមនុស្សដើម្បីពង្រឹងគុណភាពនៃការថែទាំនិងព្យាបាល និងការបង្ខិតសេ វា រីថែទាំទៅដល់ប្រជា ពល រដ្ឋ សំដៅឈានសម្រេចគោលដៅអភិវឌ្ឍប្រកបដោយចីរភាពក្នុងការកាត់ បន្ថយអត្រាមរណៈភាពដែលអាចបង្ការបានប្រទេសកម្ពុជានាឆ្នាំ២០៣០។ 

 ឯកឧត្តមបានបញ្ជាក់ថា កម្ពុជាគឺជាប្រទេសមួយនៅក្នុង ចំណោមប្រទេស 9 នៅក្នុងពិភពលោកដែលបាន សម្រេចនូវគោលដៅអភិវឌ្ឍន៍សហស្សវត្សកាត់បន្ថយអត្រាមរណ ភាពនិងទារកនៅក្នុងអត្រាប្រមាណ 75% ក្នុង១ឆ្នាំចាប់ពីឆ្នាំ 1990 ដល់ឆ្នាំ 2015។ ដោយឡែកការអង្កេតប្រជា សាស្ត្ររបស់កម្ពុជាក៏បានបង្ហាញផងដែរថា អត្រាថយចុះនៃការបាត់បង់ជីវិតរបស់មាតា 170នាក់ នៅក្នុង 10 ម៉ឺនកំ ណើតរស់មកត្រឹម 154 នាក់ ក្នុង 10 ម៉ឺនកំណើតរស់ នៅ ក្នុងឆ្នាំ 2021 ។ហើយក្នុងនោះមរណភាពទារកក៏មាន ការថយចុះដែរគឺពី 16នាក់ ក្នុង ១ពាន់កំណើតរស់ មកនៅត្រឹមចំនួន៨នាក់ ក្នុង 1ពាន់កំណើតរស់នាឆ្នាំ 2021។ការថយចុះនេះគឺសរបញ្ជាក់អំពីប្រសិទ្ធភាពនៃការផ្ដល់សេវាសុខាភិបាលនៅក្នុងប្រទេសកម្ពុជាកាន់តែមានភាពល្អប្រសើរឡើង ដោយសារតែការខិតខំប្រឹងប្រែងពី សំណាក់ក្រុមគ្រូពេទ្យ គួបផ្សំជាមួយនឹងបច្ចេកវិទ្យាទំនាក់ទំនើបផងដែរ ។ ឯកឧត្តមបានបញ្ជាក់បន្ថែមថា នៅក្នុងត្រីមាសទីមួយនៅឆ្នាំ 2024 នេះ មរណ:ភាពមាតាមានចំនួនពីរនាក់រីឯទារកមានចំនួន 53 នាក់។ដោយឡែកក្នុងត្រីមាសទី 2 មរណ:ភាពមានតែម្នាក់ រីឯទារកមានចំនួនធ្លាក់ចុះមកនៅត្រឹម 48 នាក់។ នេះក៏ដោយសារតែស្ត្រីជាមាតាបានយកចិត្តទុកដាក់មកពិនិត្យផ្ទៃពោះបានទៀងទាត់តាមការណែនាំរបស់គ្រូពេទ្យជាហេតុនាំឲ្យការជួយសង្គ្រោះបានទាន់ពេលវេលា ។

 ទន្ទឹមនឹងភាពល្អប្រសើរនេះឯកឧត្តម យូ ពិសី នូវបានអំពាវនាវនិងជម្រុញឲ្យគ្រូពេទ្យទាំងអស់ ត្រូវពង្រឹងសមត្ថ ភាពបន្ថែមទៀត ធ្វើយ៉ាងណាឲ្យដើរទាន់បច្ចេកវិជ្ជាទំនើបៗ ដើម្បីផ្តល់សេវាពិនិត្យនិងព្យាបាលកាន់តែបានល្អប្រសើរដល់ប្រជាជនទូទៅ ជាពិសេសគឺការប្រកាន់ភ្ជាប់នៅក្រមសិលធម៌វិជ្ជាជីវះគ្រូពេទ្យ ៕ 

អត្ថបទ ភារម្យ