​បាល់ទាត់៖ ​ឈានចូល​វ័យ ៣៦​ឆ្នាំ​ទៅ​ហើយ Cristiano Ronaldo មិនបាន​បង្ហាញ​ពី​ការ​ស្រុត​ចុះ​នៃ​ទំរង់​លេង មិន​មាន​បញ្ហា​ក្នុង​ការ​ស៊ុត​បញ្ចូល​ទី និង​មិន​ធ្វើ​ឱ្យ​អ្នកគាំទ្រ​របស់​ខ្លួន​អស់សង្ឃឹម ​ក្នុង​ត្រលប់​មក​រួច​អាជីព​ជាមួយ​ក្រុម​បិសាច​ក្រហម Manchester United ជា​លើក​ទី​២ ឡើយ​។

​​ជាក់ស្ដែង​ការ​បង្ហាញ​ខ្លួន​ដំបូង​ក្នុង​ការ​វិល​ត្រលប់​មក​លើក​នេះ ខ្សែប្រយុទ្ធ​ព័រទុយហ្កាល់​រូបនេះ​ធ្វើឱ្យ​កីឡដ្ឋាន Old Trafford រញ្ជួយ​នឹង​សំឡេង​ហ៊ោ​សាជាថ្មី​ក្រោយ​រកបាន​ ២​គ្រាប់​ម្នាក់​ឯងក្នុង​ជ័យជំនះ​របស់ Manchester United ៤-១ លើ Newcastle United​។ ​​ថ្វីបើ​ចាប់ផ្តើម​ដោយមាន​អារម្មណ៍​ភ័យខ្លាចក្នុង​ការឈាន​ជើង​មកកាន់ Old Trafford សាជាថ្មី Cristiano Ronaldo បាន​ក្លាយជា​កីឡាករ​ឆ្នើម​ប្រចាំ​ការប្រកួត​នេះ និង​មាន​ស្ថិតិ​ដ៏​អស្ចារ្យ​ចំនួន​៥ ពី​ការប្រកួត​ដំបូង​នេះ​។ ​​ទី​១ បន្ទាប់ពី​ចាកចេញ​ទៅ Real Madrid នៅ​ឆ្នាំ២០០៩ Ronaldo នៅពេលនេះ​បំបែក​កំណត់ត្រា​គំលាត​នៃ​ការបង្ហាញ​ខ្លួន​រយៈពេល​វែង​បំផុត​នៃ Premier League ពោលគឺ​ប្រកួត​ចុងក្រោយ​កាលពី​ឆ្នាំ២០០៩ នៃ​ការចាកចេញ​រហូតមក​ដល់​ឆ្នាំ២០២១ នេះ​។ ​ទី​២ ទោះបីជា​បាន​ប៉ះបាល់​តែ ៨លើក​ក្នុង​ប្រអប់​គ្រោះថ្នាក់​របស់ Newcastle កីឡាករ​ព័រទុយហ្កាល់​រូបនេះ​នៅតែ​អាច​ស៊ុត​បញ្ចូល​ទី​បាន ២គ្រាប់​។

​​ទី​៣ Ronaldo មានឱកាស​ស៊ុត ៦លើក​ក្នុង​ប្រកួត​នេះ ចូល​ទាំងពីរ​គ្រាប់​នៃ​ការ​ស៊ុត​ចំ​គោលដៅ​តែ​ពីរលើក​នោះ​។ ​​ទី​៤ Ronaldo បាន​ឈានឡើង​មកឈរ​លំដាប់​ទី៤៤ នៃ​តារាង​កីឡាករ​ដែល​ស៊ុត​បញ្ចូល​ទី​ច្រើន​បំផុត​នៅ Premier League ឡើង​ពីលើ Carlos Tevez, Louis Saha, Eden Hazard និង Fernando Torres​។​ ​​ទី​៥ គ្រាន់តែ​គ្រាប់​ទីមួយ​ទៅលើ Newcastle នោះ Ronaldo ក្លាយជា​កីឡា​ករទី១ ដែល​ស៊ុត​បញ្ចូល​ទី​លើសពី ៣០គ្រាប់ ១៥ឆ្នាំ​ជាប់​គ្នា ​(​ឆ្នាំ​នៃ​ប្រតិទិន មិន​មែន​រដូវ​កាល​)​។ ​​ទី​៦ គ្រាប់​ទី២ ​ក្នុងការ​ប្រកួត Ronaldo រត់​ដល់​​ល្បឿន ៣២.៥គម​/​ម​។​ ​​ទី​៧ Ronaldo មាន​បាល់​បញ្ជូន​ច្បាស់​ដល់​ទៅ ៨៧% និង​បង្កើត​ឱកាស​មួយ​គ្រាប់​ក្នុង​ជ័យជំនះ ៤-១​។​ ​ទី​៨ Ronaldo គឺជា​កីឡាករ​ចំណាស់​ទី៣ ដែល​ស៊ុត​បញ្ចូល​ទី​នៅ Premier League បន្ទាប់ពី Ryan Giggs និង Paul Scholes៕

​អត្ថបទ​៖​នាង សុភា​វុ​ធ