ក្រុមអ្នកតវ៉ានៅទីក្រុង តេល អាវីវ (Tel Aviv) កាលពីថ្ងៃសៅរ៍ បានដុតបំពួកភ្លើងនៅឯការតវ៉ា​ប្រឆាំ​ងរដ្ឋាភិបាល ដើម្បីព្រមានពីការកើនឡើងក្នុងតំបន់ ប្រសិនបើគ្មានកិច្ច​ព្រមព្រៀង​ណា​មួយ​ត្រូវ​បាន​សម្រេច ក្នុងកិច្ចចរចាដោះលែងចំណាប់ខ្មាំង និងបទឈប់បាញ់។ 

ក្រុមបាតុករបានស្រែកឃ្លា កិច្ចព្រមព្រៀង ឬការកើនឡើង ជាភាសាហេព្រូ នៅលើក្បែរ​ផ្នួក​ភ្លើង​។ កិច្ច​ចរចាបទឈប់បាញ់នៅទីក្រុង ដូហា (Doha) ប្រទេសកាតាក្នុងសប្ដាហ៍នេះ ដែលសម្រប​សម្រួលដោយសហរដ្ឋអាមេរិក កាតា និងអេហ្ស៊ីប គ្រោងនឹងចាប់ផ្តើមឡើងវិញនៅសប្តាហ៍ក្រោយ។

យោងតាមសេចក្តីថ្លែងការណ៍មួយកាលពីថ្ងៃសៅរ៍ពីការិយាល័យនាយករដ្ឋមន្ត្រី លោក Benjamin Netanyahu ក្រុមចរចារបស់អ៊ីស្រាអែលបានបង្ហាញសុទិដ្ឋិនិយមដោយប្រុងប្រយ័ត្ន លើលទ្ធភាពនៃការជំរុញកិច្ចព្រមព្រៀងមួយ។

អ្នកនាំពាក្យក្រុមហាម៉ាស លោក Jihad Taha បានប្រាប់ទូរទស្សន៍ Al Jazeera TV កាលពីថ្ងៃសៅរ៍ថា អ៊ីស្រាអែលបានបន្ថែមលក្ខខណ្ឌក្នុងកិច្ចចរចាបទឈប់បាញ់ ហើយបានចោទប្រកាន់លោក Netanyahu ថាបានប្រើប្រាស់ចេតនាទាំងនេះ ដើម្បីរារាំងកិច្ចខិតខំប្រឹងប្រែងនេះ៕