សហភាពសហព័ន្ធយុវជនកម្ពុជា នៅថ្ងៃទី១៧ ខែសីហានេះ បានរៀបចំ​ការ​ប្រកួត​វគ្គ​ផ្ដាច់​ព្រ័ត្រ​ការ​រចនា ឡូហ្គោ «កម្ពុជាក្នុងបេះដូងខ្ញុំ» ខណៈការប្រកួតវគ្គផ្ដាច់ព្រ័តនេះ គឺមានបេក្ខជនចំនួន ១០​នាក់ចុងក្រោយ ធ្វើបទបង្ហាញពីស្នាដៃរបស់ខ្លួន។

វគ្គផ្ដាច់ព្រ័តជាការតម្រូវឱ្យ បេក្ខជនទាំង ១០ រូប ធ្វើបទបង្ហាញស្នាដៃរបស់ខ្លួន នូវ​ចំពោះ​មុខ​គណៈ​មេប្រយោគ និងអ្នកចូលរួមជាច្រើននាក់។ ជាលទ្ធផល ជ័យលាភីលេខមួយ បានទៅ​លើ​យុវជន ឈ្មោះ វិសិដ្ឋ វិសាល។ 

ក្នុងឱកាសចូលរួមក្នុងការប្រកួតវគ្គផ្ដាច់ព្រ័ត ឯកឧត្តម ហ៊ុន ម៉ានី ប្រធាន​សហភាព​សហព័ន្ធ​យុវជន​កម្ពុជា បានកោតសសើរ ចំពោះបេក្ខជន​ទាំងអស់​ដែល​បាន​ចូល​រួម​ឆ្លង​កាត់​គ្រប់​ដំណាក់​កាល ​រហូតឈានដល់ ដំណាក់កាលចុងក្រោយដែលមានបេក្ខជនជាប់ឈ្មោះចំនួន១០នាក់។ ឯកឧត្តម លើកឡើង សម្រាប់លទ្ធផលយ៉ាងណាក៏ដោយ អ្វីដែលគ្រប់​បេក្ខ​ជន​ទទួល​បាន​គឺ​ជា​ការ​រៀន​សូត្រ​ដកស្រង់បទពិសោធពីគណមេប្រយោគ។ ក្រៅពីនេះ ការប្រកួត​ប្រជែង​ធម្មតាទេ​គឺ​មាន​ឈ្នះ​ និង​ចាញ់ តែអ្វីដែលបានមកវិញគឺបទពិសោធ។ ឯកឧត្តមបានលើកឡើងថា យើង​ម្នាក់​ៗ​នៅ​ទី​នេះ យើងមានតួនាទីស្មើៗគ្នាដើម្បីទទួលខុសត្រូវចំពោះជោគវាសនាប្រទេសជាតិ។

ក្នុង​ពិធីដដែលនេះ ឯកឧត្តម សុខ សប្បាយណា សមាជិក​គណៈ​អចិន្ត្រៃយ៍​គណៈ​កម្មាធិការ​កណ្ដាល ​សហភាពសហព័ន្ធយុវជនកម្ពុជា លើកឡើងឱ្យដឹងដែរថា កម្មវិធី​នេះ​រៀបចំ​ឡើង​ក្នុង​គោល​បំណង ដើម្បីផ្តល់ជាវេទិកាសម្រាប់យើងទាំងអស់គ្នាចូលរួមបង្ហាញ ភាសាបេះ​ដូង​សម្រាប់​កម្ពុជា និងជាការផ្តល់ឱកាសចូលរួមបង្ហាញ និងដុសខាត់ទេពកោសល្យរបស់ខ្លួន។ លើសពីនេះ ជា​ការផ្ដល់ឱកាសជួបជុំប្រាស្រ័យទាក់ទងគ្នាទៅវិញទៅមករបស់បេក្ខជនទាំងអស់។

ឯកឧត្តមថា ការបង្កើតកម្មវិធីប្រកួតប្រជែងនេះឡើងដើម្បីផ្តល់ឱកាសដល់អ្នករចនាគ្រប់វ័យ គ្រប់​កម្រិត អាចចូលរួមបញ្ចេញស្នាដៃប្រកបដោយភាពច្នៃប្រឌិតដើម្បីបង្កើតស្នាដៃរចនា។ ខុស​ពី​កម្ម​វិធី​ប្រកួត​ប្រជែងដទៃ កម្មវិធីប្រកួតប្រជែងនេះត្រូវបានរៀបចំជាដំណាក់កាលដោយរាប់ចាប់តាំងពី ការ​ប្រកាសជាផ្លូវការអំពីការប្រកួតប្រជែង ការរៀបចំ​សិក្ខា​សាលា​បណ្តុះ​បណ្តាល​មូល​ដ្ឋាន​គ្រឹះ​នៃ​ការ​រចនាពីសំណាក់គណៈកម្មការជំនាញទៅកាន់អ្នកចូលរួមទាំងអស់ និងដំណើរការពិនិត្យ វាយ​តម្លៃលើរាល់ស្នាដៃ ដែលបានដាក់ពាក្យចូលរួមទាំងអស់ដោយគណៈកម្មការជំនាញយ៉ាងសុក្រិត្យ និងប្រកបដោយតម្លាភាព៕ អត្ថបទ៖ គឹម ហុក