ការិយាល័យសិទ្ធិមនុស្សរបស់អង្គការសហប្រជាជាតិ បាននិយាយនៅក្នុងរបាយការណ៍បឋមមួយថា មនុស្សជាង ៦០០នាក់ត្រូវបានសម្លាប់ក្នុងអំឡុងពេលអំពើហិង្សារយៈពេលជាច្រើនសប្តាហ៍នៅក្នុងប្រទេសបង់ក្លាដែស។

អង្គការសហប្រជាជាតិបាននិយាយដោយដកស្រង់របាយការណ៍ប្រព័ន្ធផ្សព្វផ្សាយ និងចលនាតវ៉ាថា មានមនុស្សស្លាប់ប្រហែល ៤០០នាក់ត្រូវបានរាយការណ៍ពីថ្ងៃទី១៦ ខែកក្កដា ដល់ថ្ងៃទី០៤ ខែសីហា ខណៈដែលមនុស្សប្រហែល ២៥០នាក់ទៀតត្រូវបានគេនិយាយថាស្លាប់ក្នុងអំឡុងពេលរលកថ្មីនៃការតវ៉ាចាប់ពីថ្ងៃទី០៥ ដល់ថ្ងៃទី០៦ ខែសីហា។

របាយការណ៍នេះមិនបានបញ្ជាក់ចំនួនមនុស្សស្លាប់នៅក្នុងការតវ៉ាដ៏ហិង្សាសងសឹកនោះទេ បន្ទាប់ពីនាយករដ្ឋមន្ត្រី លោកស្រី សេក ហាស៊ីណា (Sheikh Hasina) បានលាលែងពីតំណែងកាលពីថ្ងៃទី០៥ ខែសីហា ហើយបានភៀសខ្លួនទៅកាន់ប្រទេសជិតខាងឥណ្ឌា។

ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក វ៉ុលឃើ ធឺក (Volker Turk) បាននិយាយនៅក្នុងរបាយការណ៍នេះថា ក្រុមការងាររបស់ទីភ្នាក់ងារអង្គការសហប្រជាជាតិនឹងទៅបំពេញទស្សនកិច្ចនៅទីក្រុងដាកា (Dhaka) នៅសប្តាហ៍ក្រោយ ដើម្បីពិភាក្សាអំពីបែបបទសម្រាប់ការស៊ើបអង្កេតលើការរំលោភសិទ្ធិមនុស្សជុំវិញបាតុកម្មដ៏កក្រើកប្រទេសមួយនេះ៕