ព្រំដែនកម្ពុជា-វៀតណាមក្នុងខេត្តក្រចេះ គិតចាប់តាំងពីមុន និងក្រោយពេលបោះបង្គោលព្រំដែនរួចរាល់១០០ភាគរយ គឺមានការការពារដែនអធិបតេយ្យភាព និងសន្តិសុខខ្ពស់ពីកងកម្លាំងនគរបាលការពារព្រំដែនគោក និងកងកម្លាំងយោធាការពារព្រំដែនយ៉ាងតឹងរឹងបំផុត។

ក្នុងពេលរាជរដ្ឋាភិបាល ក៏ដូចជាប្រជាពលរដ្ឋគ្រប់មជ្ឈដ្ឋាន ទាំងក្នុងនិងក្រៅប្រទេសប្រតិកម្មចំពោះការបំភ្លៃ និងចោទប្រកាន់ខុសការពិតទាក់ទងនឹងការបាត់ទឹកដីពីខេត្តចំនួន៤ តាមរយៈកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV-DTA) នៅថ្ងៃទី១៨ ខែសីហា ឆ្នាំ២០២៤ម្សិលមិញ ក្រុមការងាររបស់ BTV បានចុះទៅដល់តាមបន្ទាត់ព្រំដែនកម្ពុជា-វៀតណាមក្នុងក្រចេះ ដើម្បីជួបជាមួយកងកម្លាំងការពារព្រំដែនដែលកំពុងឈរជើងនៅតំបន់នោះ។ ក្នុងនោះលោកវរសេនីយ៍ទោ ឃុន ម៉ន មេបញ្ជាការរងនគរបាលការពារព្រំដែនគោល៦១៩ បានឱ្យដឹងថា ក្នុងនាមកងកម្លាំងនគរបាលការពារព្រំដែនគោលលេខ៦១៩ បានអនុវត្តតាមការណែនាំរបស់ថ្នាក់ដឹកនាំក្រសួងមហាផ្ទៃ និងការបញ្ជាផ្ទាល់របស់ស្នងការនៃស្នងការដ្ឋាននគរបាលខេត្តរតនគិរី ក្នុងការបំពេញតួនាទី និងភារកិច្ចការពារដែនដី អធិបតេយ្យភាពរបស់កម្ពុជាតាមបន្ទាត់ព្រំដែន ដោយអនុវត្តបំពេញតួនាទី ភារកិច្ចចុះល្បាតទៅតាមសមត្ថកិច្ចរៀងៗខ្លួនជារៀងរាល់ថ្ងៃ។

ជាមួយគ្នា ទាក់ទងនឹងការបំភ្លៃ ក៏ដូចជាចោទប្រកាន់ចំពោះការបាត់ដីតាមបន្ទាត់ព្រំដែនក្នុងខេត្តក្រចេះ លោកមេបញ្ជាការរងនគរបាលការពារព្រំដែនគោល៦១៩ អះអាងថា កងកម្លាំងទាំង២ប្រភេទការពារតាមបន្ទាត់ព្រំដែនតាមម៉ឺងម៉ាត់បំផុត ហើយសភាពការណ៍តាមព្រំដែន រួមទាំងបង្គោលព្រំដែននៅមានសភាពដូចដើមដដែល។

សូមជម្រាបថា ខេត្តក្រចេះដែលមានព្រំដែនជាប់នឹងប្រទេសវៀតណាមប្រវែង១០៣គីឡូម៉ែត្រនេះត្រូវបានបោះបង្គោលព្រំដែនបញ្ចប់រួចរាល់១០០ភាគរយកាលពីឆ្នាំ២០១៧ ហើយតាមបន្ទាត់ព្រំដែន និងបង្គោលព្រំដែនទាំងអស់ត្រូវបានការពារធានាសន្តិភាព សន្តិសុខ និងស្ថិរភាពយ៉ាងតឹងរឹងបំផុត ដើម្បីការពារបូរណភាពទឹកដី ព្រមទាំងសុខសុវត្ថិភាពដល់ប្រជាពលរដ្ឋតាមបន្ទាត់ព្រំដែនទទួលបានជីវភាពល្អប្រសើរ និងការអភិវឌ្ឍន៍រីកចម្រើនជាលំដាប់៕ អត្ថបទ សេក ឧត្តម