ក្រុមយុវជនដែលរៀនជំនាញខុសៗគ្នា បាននិយាយស្រដៀងគ្នាថា សព្វថ្ងៃនេះ​ឱកាស​ការងារ​មិន​ពិបាក​រកធ្វើទេ ប៉ុន្តែសំខាន់ចំពោះមុខ គឺការពង្រឹងសមត្ថភាព និងបង្កើតជំនាញមួយក្នុងជីវិត ដើម្បី​ឆ្លើយ​តបតម្រូវការទីផ្សារការងារនាពេលបច្ចុប្បន្ន និងទៅអនាគត។

យុវជន សុន វិស្សា មកពីខេត្តព្រះវិហារ បច្ចុប្បន្នជានិស្សិតឆ្នាំទី១ ជំនាញ​ផ្នែក​គណនេយ្យ​នៅ​សាកលវិទ្យាល័យ​ពាណិជ្ជសាស្រ្ត អេស៊ីលីដា (AUB) នៅក្នុងបទសម្ភាសន៍ជាមួយព័ត៌មាន ប៊ីធីវី បាន​លើកឡើង សម្រាប់ការយល់ឃើញអំពីឱកាសការងារទីផ្សារនៅប្រទេសកម្ពុជា គឺអត់​ពិបាក​រក​ទេ ដោយសារបច្ចុប្បន្នការផ្សព្វផ្សាយទាក់ទងការងារមានភាពធំទូលាយ ថែម​ទាំង​មាន​ការ​តាំង​ពិព័រណ៍​ការងារផ្សេងៗជាច្រើន ក៏ដូចជាទីកន្លែងធ្វើការជាច្រើនថែមទៀត ធ្វើការប្រកាស​ជ្រើស​រើស​កម្លាំង​ពលកម្មមានភាពទូលំទូលាយជាងមុនផងដែរ។

យុវជនរូបនេះ បានបន្តទៀតថា ចំពោះការផ្សព្វផ្សាយឱកាសការងាររបស់ក្រសួងការងារ និង​បណ្តុះបណ្តាលវិជ្ជាជីវៈរាល់ថ្ងៃនេះ ក៏មានភាពល្អប្រសើរច្រើន ដោយនាំយកឱកាសការងារល្អៗ ពី​ក្រុមហ៊ុនធំៗលើគ្រប់វិស័យ។ បន្ថែមពីនេះទៀត ក្រៅពីឱកាសការងារ ក្រសួងក៏មានការផ្គូរផ្គង និង​ផ្តល់​យោបល់ល្អៗពីការត្រៀមខ្លួនមុនចូលទីផ្សារការងារទៀតផង។

ពាក់ព័ន្ធឱកាសទីផ្សារការងារនេះដែរ ក្រុមយុវជនមកពីវិទ្យាស្ថានជាតិបណ្តុះបណ្តាលបច្ចេកទេស (NTTI) បានឲ្យ ប៊ីធីវី ដឹងដែរថា ពីមុនការងារពិតជាពិបាករកធ្វើមែន ដោយសារ​ការ​ទទួល​បាន​ព័ត៌មាន​មានកម្រិត ប៉ុន្តែមកដល់បច្ចុប្បន្ននេះ ទីផ្សារការងារកាន់តែធំទូលាយ តាមរយៈ​ការ​ផ្សព្វ​ផ្សាយ​ព័ត៌មានរបស់ក្រសួងការងារ និងបណ្តុះបណ្តាលវិជ្ជាជីវៈ ដូចជាកម្មវិធីពិព័រណ៍ការងារ , តាម​រយៈមជ្ឈមណ្ឌលការងារចល័ត និងការផ្សព្វផ្សាយតាមបណ្តាញសង្គមជាដើម ក្រៅពី​ការ​ប្រកាស​ជ្រើសរើសបុគ្គលិកពីក្រុមហ៊ុន សហគ្រាសនានា។

សូមជម្រាបជូនថា ក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី១៦ ដល់១៨ ខែសីហា ឆ្នាំ​២០២៤ បានរៀបចំកម្មវិធី "ពិព័រណ៍ការងារ និងមគ្គទេសក៍អាជីព" នៅផ្សារទំនើបអ៊ីអន ម៉ល សែន​សុខ (អ៊ីអន២) ដោយមានក្រុមហ៊ុនធំៗចំនួន២០ ចូលរួមតាំង​បង្ហាញ​ឱកាស​ការងារ​សម្រាប់​ផ្តល់​ជូនយុវជន សិស្ស/និស្សិត និងអ្នកស្វែងរកការងារចំនួនជាង ៥ពាន់កន្លែង៕ អត្ថបទ ឈិត បូរ៉ាវី