ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាព​អ្នកនាំ​ពាក្យ​រាជ​រដ្ឋាភិបាលបានថ្លែងថា រាជរដ្ឋាភិបាល អាណត្តិទី៧ ក្រោមការដឹកនាំដោយ​សម្ដេច​មហាបវរ​ធិបតី ហ៊ុន ម៉ាណែត បានប្ដេជ្ញាយ៉ាងមុតមាំបន្តពីសម្ដេចតេជោ ហ៊ុន សែន អតីតនាយករដ្ឋមន្ត្រី ដោយ​មិន​យក​អធិបតេយ្យភាព ជាតិទៅប្ដូរនឹងជំនួយរបស់បរទេស និងមិនធ្វើ​ឱ្យ​បាត់បង់​ទឹកដី​សូម្បី​តែ​មួយ​មីល្លីម៉ែត្រ។

ក្នុងវេទិកាសារព័ត៌មាន លើកទី៤ ដំណើរឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ ក្លាយ​ជា​ប្រទេស​មានចំណូលខ្ពស់ នៅព្រឹកថ្ងៃទី១៩ ខែសីហា ឆ្នាំ២០២៤ ឯកឧត្តម ប៉ែន បូណា មាន​ប្រសាសន៍ថា ក្រោយពីរំដោះប្រទេសចេញពីរបប ប៉ុល ពត ថ្ងៃ៧ មករា ឆ្នាំ១៩៧៩ រាជ​រដ្ឋាភិបាល ដៃម្ខាងកសាង គឺការអភិវឌ្ឍប្រទេស ចេញពីទីលានកបសាកសព្វ ចេញ​ពី​ស្ថាន​ភាព​ក្រ​រហេម​រហាម​បំផុតនៅក្នុងលោក ដើម្បីក្លាយជាប្រទេសអភិវឌ្ឍន៍ច្រឡំនឹងគេ ដូចសព្វថ្ងៃ និង​ដៃ​ម្ខាង​ទៀត​ការពារ គឺការពារមិនឲ្យរបបខ្មែរក្រហមត្រឡប់មកវិញ និងការពារបូរណភាពជាតិទឹកដី ដែល​នៅសល់ ១៨១ ០៣៥គីឡូម៉ែត្រក្រឡា ឲ្យបានគង់វង្ស ដើម្បីកុំឲ្យបាត់បង់ ។

ឯកឧត្តមបន្តថា សម្រាប់ការការពារនេះ គឺចាប់ផ្ដើមពីជំហរម៉ឺងមាត់ ច្បាស់លាស់ ដាច់ខាត​របស់​ថ្នាក់​ដឹក​នាំ សម្ដេចតេជោអតីតនាយករដ្ឋមន្ត្រី និងបន្តមកសម្ដេចធិបតី នាយករដ្ឋមន្ត្រីបច្ចុប្បន្ន ដោយ​កម្ពុជាមិនយកអធិបតេយ្យភាពទៅដោះដូរនឹងជំនួយ ឬការអនុ​គ្រោះពន្ធ​ណាមួ​យ​ពី​បរទេស​ជា​ដាច់​ខាត។

ជាមួយនេះ ប្រធានអង្គភាពអ្នកនាំពាក្យរាជរដ្ឋាភិបាល បានបញ្ជាក់ថា រាជរដ្ឋាភិបាល​ដឹក​នាំ​ដោ​យ​គណបក្ស​ប្រជាជនកម្ពុជា មានភាពរឹងមាំខ្លាំងណាស់ ក្នុងការទប់ទល់គ្រប់ឧបាយកល ដែលចង់​បំផ្លាញ​សេចក្តីសុខ សន្តិភាព ស្ថិរភាពនយោបាយ គឺរាជរដ្ឋាភិបាលឈររឹងមាំ ដើម្បីការពារ​សុខ​សន្តិភាព ស្ថិរភាពនយោបាយ អធិបតេយ្យភាពជាតិ បូរណភាពទឹកដី ។

ឯកឧត្តម ប៉ែន បូណា បានព្រមានថា រយៈពេលចុងក្រោយនេះ មានក្រុមប្រឆាំងជ្រុលនិយម ចង់​ធ្វើ​បាតុកម្មផ្ដួលរំលំរាជរដ្ឋាភិបាល ចង់ជម្រាបថា ទៅមិនរួចទេ កុំសាកល្បង បើមិន​ស្គាល់​គណបក្ស​ប្រជាជនកម្ពុជា ត្រូវងាកមកវិញ សិក្សានូវគោលនយោបាយរាជរដ្ឋាភិបាលឲ្យច្បាស់ កុំធ្វើ​អ្វី​ប្រឆាំងនឹងសន្តិភាព និងស្ថិរភាពនយោបាយ ដោយរាជរដ្ឋាភិបាលឈរការពារយ៉ាងរឹងមាំ ដែលជាភាពកក់ក្ដៅ និងជាទីទុកចិត្តរបស់ពលរដ្ឋខ្មែរ៕ អត្ថបទ បាន សុខរិទ្ធិ