​រុស្ស៊ី៖ ប្រទេស​រុស្ស៊ី ​និង​បេឡា​រុស​បាន​ចាប់ផ្តើម​ធ្វើ​សម​យុទ្ធ​យោធា​រួមគ្នា រយៈពេល​មួយ​សប្តាហ៍​មានឈ្មោះ​ថា Zapad-2021 ឬ West-2021 នៅ​តំបន់ Pskov ប្រទេស​រុស្ស៊ី​។ ការ​ធ្វើ​ស​មយុទ្ធ​នេះ​ធ្វើ​ឡើង​លើ​ផ្ទៃដី​ជាង ២.០០០​គីឡូម៉ែត្រ​ការ៉េ និង​មានការ​ចូលរួមពី​កងទ័ព​ប្រមាណ ២០០.០០០​នាក់, នាវា​ចម្បាំង ១៥​គ្រឿង, យន្ត​ហោះ​ជាង ៨០​គ្រឿង, ​រថក្រោះ ២៩០​គ្រឿង​ និង​កាំភ្លើង​ធំ ២៤០​គ្រឿង​។​

​ការ​ទម្លាក់​ខ្លួន​ពីលើ​អាកាស​នៅ​ពេល​យប់​របស់​កងទ័ព​ជាង ៦០០​នាក់ និង​រថពាសដែក ៣០​គ្រឿង​ត្រូវ​បាន​អនុវត្ត​ជា​លើកដំបូង​នៅ​ក្នុង​តំបន់ Pskov ជាមួយ​នឹង​យន្តហោះ​ដឹក​ទំនិញ​ទម្លាក់​សម្ភារៈ​របស់​ពួកគេ​ទៅ​ទីតាំង ២កន្លែង​នៅ​រយៈកម្ពស់​ពី ៦០០ ទៅ ៤០០០​គីឡូម៉ែត្រ​។​ ប្រធានា​ធិបតី​រុស្ស៊ី លោក​ Vladimir Putin បាន​ទទូច​កាល​ពី​សប្តាហ៍​មុន​ថា ការ​ធ្វើ​សម​យុទ្ធ​យោធា​រួមគ្នា​ជាមួយ​ប្រទេស​បេឡា​រុស គ្មាន​បំណង​បង្ហាញ​ប្រទេស​ណា​មួយ​ថា​ជា​ការ​គំរាមកំហែង​ឡើយ​។

​លោក​បាន​និយាយ​ជាមួយ​ប្រធានាធិបតីបេឡា​រុស លោក Alexander Lukashenko នៅ​ទីក្រុង​មូ​ស្គូ ខណៈ​សម​យុទ្ធ​ចាប់ផ្ដើម​។ លោក Putin និយាយ​ថា សម​យុទ្ធ​ទាំងនេះ​មិន​សំដៅ​ប្រឆាំង​នរណា​ម្នាក់​ឡើយ​។​ អនុរដ្ឋមន្ត្រី​ក្រសួង​ការពារជាតិ​រុស្ស៊ី លោក Nikolay Pankov បាន​ចាត់​ទុក​សម​យុទ្ធ​នេះ​ថាជា​សម​យុទ្ធ​ការពារ​សុទ្ធសាធ​។​

អត្ថបទ៖ ប៊ុន ថន