ភ្នំពេញ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងប្រតិភូអមដំណើរ បានជួបសំណេះសំណាល សួរសុខទុក្ខ ព្រមទាំងផ្តល់អនុសាសន៍ ដល់ថ្នាក់ដឹកនាំ មន្រ្តីរាជការ និងបុគ្គលិកសុខាភិបាល នៃមន្ទីរសុខាភិបាលនៃរដ្ឋបាលខេត្តប៉ៃលិន, កាលពីថ្ងៃទី១៨ ខែសីហា ឆ្នាំ២០២៤។

​ឯកឧត្តមសាស្ត្រាចារ្យរដ្ឋមន្ត្រី សម្តែងអំណរគុណ និងកោតសរសើរថ្នាក់ដឹកនាំ រួមទាំងបុគ្គលិកសុខាភិបាលទាំងអស់ ទាំងអជ្ញាធរ សមត្ថកិច្ចមូលដ្ឋាន ដែលបានចូលរួមយ៉ាងសកម្មជាគំរូវីរភាព ប្រយុទ្ធប្រឆាំងនឹងជំងឺកាចសាហាវកូវីដ-១៩ កន្លងមក។ ឯកឧត្តមសាស្ត្រាចារ្យ ជំរុញអោយរក្សាបាន និងធ្វើអោយបានកាន់តែប្រសើរ ជាប់ជាប្រចាំ នូវអាកប្បកិរិយា-ឥរិយាបទល្អ ស្រលាញ់រាប់អាន-សាមគ្គីភាព ប្រកបដោយវិជ្ជមានភាពខ្ពស់ នៃការគិត ទាំងក្នុងពេលបំពេញការងារ ក៏ដូចជាពេលប្រាស្រ័យទាក់ទងក្នុងសហគមន៍-ក្រុមគ្រួសារ ដែលនេះជាកត្តាឈ្នះ និងជោគជ័យមួយ មិនអាចខ្វះបាន និងជាចំនុចចាប់ផ្តើមចាំបាច់បំផុតសម្រាប់គ្រប់អ្នកដឹកនាំវិស័យសុខាភិបាល។ ....សម្លេងឯ.ឧ ឈាង រ៉ា យកជាង០១នាទី....(sound 01)

ឯកឧត្តមសាស្ត្រាចារ្យ ឈាង រ៉ា បានផ្តល់អនុសាសន៍ដល់បុគ្គលិកសុខាភិបាលទាំងអស់ សូមបង្កើនការយកចិត្តទុកដាក់បង្កើនសមត្ថភាពជំនាញ និងបន្តបណ្តុះបណ្តាលជានិរន្តន៍ ក្នុងការពិនិត្យល្អិតល្អន់ មុនការផ្តល់រោគវិនិច្ឆ័យជំងឺ និងជជែករួមគ្នាសម្រេចរោគវិនិច្ឆ័យ និងវិធីសាស្ត្រព្យាបាល ដោយត្រូវតែនាំយកការពន្យល់ច្បាស់លាស់ ជាដំណាក់កាលៗ ជូនដល់អ្នកជំងឺ-ក្រុមគ្រួសារ ជាចាំបាច់។

ជាចុងបញ្ចប់ ឯកឧត្តមសាស្ត្រាចារ្យរដ្ឋមន្ត្រី បានចែករំលែកបទពិសោធន៍សំរាប់ការប្រតិបត្តិប្រចាំថ្ងៃ ដែលឈរលើទិដ្ឋភាពប្រាំយ៉ាងនៃភាពអ្នកដឹកនាំ ដោយរួមបញ្ចូលគ្នា៖ ១- “ដឹកនាំ” ត្រូវចេញពីការស្រលាញ់ដោយពិតប្រាកដ ចេញពីបេះដូង។ ២- “ដឹកនាំ” ត្រូវឈរលើគំនិតប្រាជ្ញា “គិត” ល្អ គិតត្រូវ (គិតបែបគតិបណ្ឌិត) សំដៅបម្រើប្រយោជន៏សាធារណៈ ប្រយោជន៏ប្រជាពលរដ្ឋ។ ៣- “ដឹកនាំ” គឺត្រូវធ្វើដោយ “ដៃ” ខ្លួនឯងផ្ទាល់ បង្ហាញដោយផ្ទាល់ ដឹកដៃអោយធ្វើ បង្ហាញជាគំរូ។ ៤- “ដឹកនាំ” សំដៅលើកិច្ចការដែលត្រូវធ្វើ គឺធ្វើអោយបានល្អបំផុត រហូតធ្វើបាន បានទៅជា”ទម្លាប់” និងបង្កើតជាប្រពៃណីល្អយូរអង្វែង និង ៥- “ដឹកនាំ” ត្រូវផ្តើមពីខ្លួនម្នាក់ៗជាមួយ ការគិតគូអំពីការថែរក្សា “សុខភាព”។

ក្នុងពិធីជួបសំណេះសំណាល មានការអញ្ជើញចូលរួមពី ឯកឧត្តម លោកជំទាវ ប្រតិភូជារដ្ឋលេខាធិការ អគ្គនាយក ក្រុមការងារជំនាញនៃក្រសួងសុខាភិបាល និងការចូលរួមពីអាជ្ញាធរមូលដ្ឋាន ប្រធានក្រុមប្រឹក្សាខេត្តប៉ៃលិន លោកជំទាវបណ្ឌិត អភិបាលខេត្តប៉ៃលិន និងប្រធានមន្ទីរសុខាភិបាលនៃរដ្ឋបាលខេត្តប៉ៃលិន អនុប្រធានមន្ទីរសុខាភិបាល ប្រធានការិយាល័យមន្ទីរសុខាភិបាល ប្រធានការិយាល័យសុខាភិបាលស្រុកប្រតិបត្តិ ប្រធាន អនុប្រធានមន្ទីរពេទ្យ និងប្រធានមណ្ឌលសុខភាព៕

អត្ថបទ រដ្ឋា​