ក្រសួងការបរទេសអ៊ីរ៉ាក់កាលពីថ្ងៃអាទិត្យ បានកោះអញ្ជើញភារៈធារីរបស់ចក្រភពអង់គ្លេស នៅទីក្រុងបាកដាដ ដើម្បីតវ៉ាប្រឆាំងនឹងអត្ថាធិប្បាយរបស់ឯកអគ្គរដ្ឋទូតរបស់ខ្លួនអំពីប្រទេសអ៊ីរ៉ាក់។

សេចក្តីថ្លែងការណ៍ដែលចេញដោយក្រសួង បាននិយាយថា ការអត្ថាធិប្បាយរបស់ឯកអគ្គរដ្ឋទូតអង់គ្លេសប្រចាំនៅអ៊ីរ៉ាក់ លោក Stephen Hitchen ដែលបច្ចុប្បន្ននៅក្រៅប្រទេសអ៊ីរ៉ាក់ «បានបង្ហាញពីរូបភាពដ៏ក្រៀមក្រំនៃសន្តិសុខ និងស្ថានការណ៍នយោបាយរបស់ប្រទេសអ៊ីរ៉ាក់ ដែលឆ្លុះបញ្ចាំងជាអវិជ្ជមានលើរដ្ឋាភិបាលរបស់ប្រទេសនេះ និងសហគមន៍ចម្រុះរបស់ខ្លួន។

សេចក្តីថ្លែងការណ៍នោះ បានឲ្យដឹងថា ក្រសួងបានចាត់ទុកការលើកឡើងរបស់ឯកអគ្គរដ្ឋទូតថា ជាការជ្រៀតជ្រែកចូលកិច្ចការផ្ទៃក្នុងរបស់អ៊ីរ៉ាក់ និងការចាកចេញពីតួនាទីការទូត ដែលបានប្រគល់ឲ្យឯកអគ្គរដ្ឋទូតរូបនេះ។

ក្រសួងមិនបានផ្តល់ព័ត៌មានលម្អិតអំពីមតិយោបល់ណាមួយដែលខ្លួនសំដៅទៅលើនោះទេ ប៉ុន្តែយោងតាមរបាយការណ៍ប្រព័ន្ធផ្សព្វផ្សាយក្នុងស្រុក Hitchen បានពិភាក្សាក្នុងកម្មវិធីទូរទស្សន៍មួយកាលពីប៉ុន្មានថ្ងៃមុនអំពីបញ្ហាដែលកើតឡើងពីការបញ្ចូលកងជីវពលទៅក្នុងស្ថាប័នយោធារបស់រដ្ឋាភិបាលអ៊ីរ៉ាក់។