ក្រុមភ្នាក់ងារពន្លត់អគ្គិភ័យទួរគី និងក្រុមស្ម័គ្រចិត្ត បានព្យាយាមពន្លត់ភ្លើងឆេះព្រៃដែលបានឆាបឆេះឡើងនៅតំបន់ភាគនិរតីប្រទេស កាលពីថ្ងៃអាទិត្យ ។

លោក Ibrahim Yumakli គឺជារដ្ឋបាលព្រៃឈើទួរគី និយាយថា កិច្ចខិតខំរបស់ក្រុមភ្នាក់ងារពន្លត់អគ្គិភ័យនឹងបន្តពេញមួយយប់ ហើយខ្យល់ស្ងប់ងាយស្រួលពន្លត់ភ្លើងឆេះព្រៃច្រើន ។

លោកបន្តថា ក្រុមអាជ្ញាធរ បានជួយអន្តរាគមន៍ពន្លត់ភ្លើងឆេះព្រៃសរុប ២៤៧កន្លែងនៅតាមតំបន់ព្រៃ និងតំបន់ជនបទ ចាប់តាំងពីព្រឹកថ្ងៃព្រហស្បតិ៍សប្តាហ៍មុនរហូតមក ហើយភ្លើងឆេះព្រៃ ២៤១កន្លែង ត្រូវទប់ស្កាត់បាន ។

លោកបញ្ជាក់ទៀតថា បច្ចុប្បន្នគ្មានភ្លើងឆេះព្រៃណា ធ្វើឲ្យពួកយើងព្រួយបារម្ភនោះឡើយ ។ ភ្លើងឆេះព្រៃធំៗ ២កន្លែង បន្តឆាបឆេះចាប់តាំងពីយប់ថ្ងៃព្រហស្បតិ៍រហូតមក ក្នុងនោះភ្លើងឆេះព្រៃមួយ នៅខេត្តភាគលិច Izmir និងភ្លើងឆេះព្រៃមួយទៀតនៅខេត្តភាគខាងជើង Bolu ត្រូវទប់ស្កាត់បានកាលពីព្រឹកថ្ងៃអាទិត្យ ។

ក្រុមអាជ្ញាធរទួរគី បានព្រមានពីហានិភ័យខ្ពស់នៃភ្លើងឆេះព្រៃបន្ថែមទៀតនៅតំបន់ភាគខាងជើង និងតំបន់ភាគខាងលិចប្រទេសនារយៈពេល ២ថ្ងៃក្រោយ ដោយសារសីតុណ្ហភាពខ្ពស់ សំណើមទាប និងខ្យល់បក់ខ្លាំង ។

សូមបញ្ជាក់ថា តំបន់ជាច្រើនរបស់ទួរគី ជាពិសេសនៅតំបន់ឆ្នេរ Mugla ញាំញីដោយសារភ្លើងឆេះព្រៃរយៈពេលប៉ុន្មានឆ្នាំចុងក្រោយនេះ ពេលដែលរដូវក្តៅកាន់តែក្តៅខ្លាំង និងស្ងួតជាងមុន ដោយសារតែបញ្ហាបម្រែបម្រួលអាកាសធាតុ ៕