យោងតាមអាជ្ញាធរ និងអ្នកជំនាញស៊ូដង់ បានឲ្យដឹងថា ជំងឺឆ្លង ក្នុងនោះរួមមានទាំងជំងឺអាសន្នរោគ និងជំងឺភ្នែកក្រហមផងដែរ កំពុងរីករាលដាលយ៉ាងឆាប់រហ័ស នៅក្នុងប្រទេសស៊ូដង់ ដោយសារតែជម្លោះអូសបន្លាយពេលដែលបានប៉ះពាល់យ៉ាងធ្ងន់ធ្ងរដល់វិស័យសុខាភិបាលរបស់ប្រទេស គួបផ្សំជាមួយការភ្លៀងធ្លាក់ខ្លាំងប្រចាំឆ្នាំ និងទឹកជំនន់ផងដែរ។

កាលពីថ្ងៃអាទិត្យ (ទី១៨ ខែសីហា) រដ្ឋមន្ត្រីសុខាភិបាលស៊ូដង់ លោក Haitham Mohamed Ibrahim បានឲ្យដឹងនៅក្នុងសេចក្តីថ្លែងការណ៍ថា ចំនួនករណីជំងឺអាសន្នរោគ ក្នុងប្រទេស បានកើនឡើងដល់ ៣៥៤នាក់ ក្នុងនោះក៏មានអ្នកស្លាប់ចំនួន ២២នាក់ផងដែរ។

ហើយអាជ្ញាធរស៊ូដង់ បានប្រកាសជាផ្លូវការនូវការផ្ទុះឡើងនូវជំងឺអាសន្នរោគ នៅក្នុងប្រទេស នៅមួយថ្ងៃមុននេះ ដោយកត់សម្គាល់ថា ការធ្វើតេស្តមន្ទីរពិសោធន៍ បានបញ្ជាក់ពីការរីករាលដាលនៃជំងឺអាសន្នរោគនៅក្នុងតំបន់ផ្សេងៗគ្នានៃប្រទេសស៊ូដង់ ដែលរួមមានរដ្ឋ Kassala, Gedaref, Gezira និង Khartoum។

តែអង្គការសុខភាពពិភពលោក (WHO) បានរាយការណ៍ថា មានចំនួនច្រើនជាងនេះ។ កាលពីថ្ងៃទី១៦ ខែសីហា តាមសេចក្តីរាយការណ៍ អ្នកនាំពាក្យរបស់ WHO គឺលោកស្រី Margaret Harris បានឲ្យដឹងនៅក្នុងការសម្ភាសជាមួយសារព័ត៌មានថា ករណីជំងឺអាសន្នរោគចំនួន ១១.៣២៧ករណី ដោយមានស្លាប់ ៣១៦ករណី ត្រូវបានរាយការណ៍នៅក្នុងប្រទេសស៊ូដង់ ហើយថា ជំងឺរាតត្បាតផ្សេងទៀត ដូចជាជំងឺគ្រុនឈាម និងជំងឺរលាកស្រោមខួរ ក៏កំពុងកើនឡើងផងដែរ។

លោកស្រីបានបញ្ជាក់បន្ថែមថា WHO រំពឹងថា តួលេខពិតប្រាកដនៃការឆ្លងជំងឺអាសន្នរោគនឹងខ្ពស់ជាងចំនួនដែលបានរាយការណ៍។

យោងតាមក្រសួងសុខាភិបាលស៊ូដង់ បានឲ្យដឹងថា ការផ្ទុះឡើងនូវជំងឺអាសន្នរោគ គឺបណ្តាលមកពីកត្តាបរិស្ថានកាន់តែអាក្រក់ទៅៗ ដោយសារសង្គ្រាម និងការប្រើប្រាស់ទឹកដែលមិនមានសុវត្ថិភាព នៅក្នុងតំបន់មួយចំនួន៕