អ្នកនាំពាក្យរបស់លោកបាននិយាយកាលពីថ្ងៃសៅរ៍ថា អគ្គលេខាធិការអង្គការសហប្រជាជាតិលោក លោក អង់តូនីញ៉ូ ហ្គុយតឺរេស (Antonio Guterres) បានសរសើរការសម្រេចចិត្តរបស់ស៊ូដង់ក្នុងការបើកច្រកព្រំដែន Adre ជាមួយប្រទេសឆាដឡើងវិញសម្រាប់បញ្ជូនជំនួយមនុស្សធម៌ចូលទៅក្នុងតំបន់ដាហ្វឺ (Darfur) ដែលបំផ្លិចបំផ្លាញដោយសង្រ្គាម។ 

លោក Stephane Dujarric អ្នកនាំពាក្យរបស់ប្រមុខ UN បាននិយាយនៅក្នុងសេចក្តីថ្លែងការណ៍មួយថា លោកអគ្គលេខាធិការ បានសរសើរការសម្រេចចិត្តក្នុងការបើកឡើងវិញនូវ «ផ្លូវត្រង់បំផុត និងមានប្រសិទ្ធភាពបំផុតសម្រាប់ជំនួយមនុស្សធម៌ ចូលទៅដល់មនុស្សរាប់លាននាក់ នៅក្នុងតំបន់ដាហ្វឺ ដែលប្រឈម នឹងកម្រិតនៃភាពស្រេកស្រេកឃ្លានដ៏ធ្ងន់ធ្ងរ» ។

លោក Dujarric បាននិយាយថា លោក ហ្គុយតឺរេស បានគូសបញ្ជាក់ពីសារៈសំខាន់នៃវិធានការជាក់ស្តែង និងនិរន្តរភាព ដើម្បីជួយសម្រួលដល់ការទទួលបានជំនួយមនុស្សធម៌ និងការពារជនស៊ីវិល ដោយអនុលោមតាមកាតព្វកិច្ចរបស់ភាគីស៊ូដង់ ក្រោមច្បាប់មនុស្សធម៌អន្តរជាតិ និងលក្ខខណ្ឌដែលបានព្រមព្រៀងពីមុន។

សេចក្តីថ្លែងការណ៍ បានបញ្ជាក់ថា៖«អង្គការមនុស្សធម៌ ត្រូវតែមានការចូលដំណើរការពេញលេញ សុវត្ថិភាព និងគ្មានការរារាំង ដើម្បីទៅដល់ជនស៊ីវិលទាំងអស់ដែលខ្វះខាតនៅទូទាំងតំបន់ដាហ្វឺ និងប្រទេសទាំងមូល ដោយបន្ថែមថា UN នៅតែប្តេជ្ញាចិត្តយ៉ាងពេញលេញ ក្នុងការធ្វើការជាមួយភាគីពាក់ព័ន្ធទាំងអស់ ដើម្បីជួយបញ្ចប់ជម្លោះ និងបន្ធូរបន្ថយការឈឺចាប់របស់ប្រជាជនស៊ូដង់»។