គេហទំព័រគាំទ្រវិមានក្រឹមឡាំង ដែលក្លែងបន្លំថា ជាគេហទំព័រ «ព័ត៌មាន» របស់សហរដ្ឋអាមេរិក បានបញ្ចេញយ៉ាងព្រោងព្រាតនូវការអះអាងដែលគ្មានមូលដ្ឋានថា អ្នកប្រជាធិបតេយ្យ បានគ្រោងធ្វើឃាតលោក Donald Trump ដោយនេះជាឧទាហរណ៍ដ៏សំខាន់នៃរបៀបដែលបណ្ដាញសារព័ត៌មានក្លែងក្លាយដំណើរការ ដោយបញ្ញាសិប្បនិម្មិត (AI) កំពុងបញ្ចេញព័ត៌មានមិនពិតក្នុងន័យអុជអាល នៅក្នុងឆ្នាំបោះឆ្នោតដែលមានហានិភ័យខ្ពស់។

ក្រុមអ្នកស្រាវជ្រាវព័ត៌មានមិនពិត បានឲ្យដឹងថា បណ្តាញសារព័ត៌មានក្លែងក្លាយរាប់រយ បានរីកដុះដាលដូចផ្សិត ក្នុងរយៈពេលប៉ុន្មានខែថ្មីៗនេះ ដោយមានគេហទំព័រសារព័ត៌មានអាមេរិកចក្នុងចំនួនដ៏ច្រើន ជាហានិភ័យដែលកំពុងលុបបំបាត់ជំនឿលើប្រព័ន្ធផ្សព្វផ្សាយបែបប្រពៃណី ក្នុងខណៈពេលដែលការប្រកួតប្រជែងដណ្ដើមកៅអីសេតវិមាន មានសភាពកាន់តែខ្លាំងក្លាឡើងៗ។

គេហទំព័រក្លែងក្លាយ ដែលភាគច្រើនអាចបើកដំណើរការដោយឧបករណ៍ AI មានតម្លៃថោក និងអាចរកបានយ៉ាងទូលំទូលាយ កំពុងជំរុញឲ្យមានការរីករាលដាលយ៉ាងខ្លាំងក្លានូវការបញ្ចេញមតិក្នុងន័យបំបែកបំបាក់ ឬនិយាយរឿងរ៉ាវមិនពិត ខណៈដែលមន្ត្រីសហរដ្ឋអាមេរិកព្រមានថា មហាអំណាចបរទេស ដូចជារុស្ស៊ី និងអ៊ីរ៉ង់ជាដើម កំពុងបង្កើនកិច្ចប្រឹងប្រែងនេះ ដើម្បីជ្រៀតជ្រែក ក្នុងការបោះឆ្នោតថ្ងៃទី៥ ខែវិច្ឆិកា។

កាលពីដើមខែសីហា បណ្តាញនៃគេហទំព័ររាប់សិបចម្លងតាមគេហទំព័រព័ត៌មានក្នុងស្រុកឯករាជ្យ ដែលជាកម្មសិទ្ធិរបស់អតីតទាហានជើងទឹកអាមេរិក លោក John Dougan ដែលរត់ភៀសខ្លួនទៅរុស្ស៊ី ខណៈកំពុងប្រឈមមុខនឹងការចោទប្រកាន់នៅរដ្ឋ Florida ពីបទជំរិតទារប្រាក់ និងការលួចស្ដាប់នោះ បានផ្សព្វផ្សាយការអះអាងមិនពិតថា គណបក្សប្រជាធិបតេយ្យជាអ្នកនៅពីក្រោយការប៉ុនប៉ងធ្វើឃាតលើ Trump នៅក្នុងខែកក្កដា៕