មេដឹកនាំបណ្ដោះអាសន្នរបស់ប្រទេសបង់ក្លាដែស គឺលោក Muhammad Yunus បានថ្លែងសុន្ទរកថាគោលនយោបាយរដ្ឋាភិបាលដ៏សំខាន់លើកដំបូងរបស់លោក ដែលលោកបានសន្យាថា នឹងគាំទ្រសហគមន៍រ៉ូហ៊ីងយ៉ា ដែលកំពុងស្វែងរកការជ្រកកោននៅក្នុងប្រទេស និងបន្តពាណិជ្ជកម្មសម្លៀកបំពាក់របស់ប្រទេសបង់ក្លាដែស។

ដោយកំណត់អាទិភាពនានារបស់លោក នៅចំពោះមុខអ្នកការទូត និងតំណាងអង្គការសហប្រជាជាតិ កាលពីថ្ងៃអាទិត្យ (ទី១៨ ខែសីហា) លោក Yunus បានសន្យាថា រដ្ឋាភិបាលរបស់លោក «នឹងបន្តគាំទ្រដល់ប្រជាជនរ៉ូហ៊ីងយ៉ារាប់លាននាក់ដែលស្នាក់នៅក្នុងប្រទេសបង់ក្លាដែស»។

លោកបានលើកឡើងថា៖ «យើងត្រូវការកិច្ចខិតខំប្រឹងប្រែងប្រកបដោយនិរន្តរភាពរបស់សហគមន៍អន្តរជាតិសម្រាប់ប្រតិបត្តិការមនុស្សធម៌រ៉ូហ៊ីងយ៉ា និងការធ្វើមាតុភូមិនិវត្តន៍ជាយថាហេតុរបស់ពួកគេទៅកាន់ប្រទេសកំណើតរបស់ពួកគេ គឺសហភាពមីយ៉ាន់ម៉ា ប្រកបដោយសុវត្ថិភាព សេចក្តីថ្លៃថ្នូរ និងសិទ្ធិពេញលេញ»។

គួរបញ្ជាក់ថា ប្រទេសបង់ក្លាដែស ជាជម្រករបស់ជនជាតិរ៉ូហ៊ីងយ៉ាប្រមាណជា ១លាននាក់។ ពួកគេភាគច្រើនបានភៀសខ្លួនចេញពីប្រទេសជិតខាងមីយ៉ាន់ម៉ា ក្នុងឆ្នាំ២០១៧ បន្ទាប់ពីមានការបង្រ្កាបពីសំណាក់ពួកយោធា ដែលឥឡូវនេះ ក្លាយជាកម្មវត្ថុនៃការស៊ើបអង្កេត ជុំវិញការប្រព្រឹត្តិអំពើប្រល័យពូជសាសន៍របស់តុលាការអង្គការសហប្រជាជាតិ។

សម្រាប់លោក Yunus អ្នកសេដ្ឋវិទូវ័យ ៨៤ឆ្នាំ ដែលឈ្នះពានរង្វាន់ណូបែលសន្តិភាព បានវិលត្រឡប់មកពីអឺរ៉ុបវិញក្នុងខែនេះ បន្ទាប់ពីត្រូវបានជ្រើសរើសដោយប្រធានាធិបតី លោក Mohammed Shahabuddin ឲ្យដឹកនាំរដ្ឋាភិបាលបណ្តោះអាសន្ន ដោយបំពេញតម្រូវការសំខាន់ៗរបស់មេដឹកនាំបាតុកម្មរបស់និស្សិត។ អ្នកកាន់តំណែងមុន គឺលោកស្រី Sheikh Hasina វ័យ ៧៦ឆ្នាំ បានភៀសខ្លួនចេញពីប្រទេសកាលពីថ្ងៃទី៥ ខែសីហា ដោយឧទ្ធម្ភាគចក្រ ក្រោយការកាន់អំណាចរយៈពេល ១៥ឆ្នាំ ត្រូវបានទម្លាក់ដោយការតវ៉ាប្រឆាំងរដ្ឋាភិបាល៕