សារព័ត៌មានក្នុងស្រុក រាយការណ៍ថា ក្រុមជួយសង្រ្គោះ កំពុងស្វែងរកមនុស្សបាត់ខ្លួន ៧នាក់ ក្រោយទូកក្តោងដឹកមនុស្ស ២២នាក់ បានលិចនៅព្រឹកថ្ងៃចន្ទនេះ នៅជិតទីក្រុង Palermo កោះ Sicily ប្រទេសអ៊ីតាលី ។

 ក្រុមឆ្មាំល្បាតឆ្នេរ និងក្រុមភ្នាក់ងារពន្លត់អគ្គិភ័យអ៊ីតាលី បានសង្រ្គោះមនុស្ស ១៥នាក់ រួមទាំងកុមារម្នាក់ផងដែរ ក្រោយទូកក្តោងចងទង់ជាតិអង់គ្លេសប្រវែង ៥០ម៉ែត្រ បានលិច អំឡុងជួបរលកសមុទ្រធំ និងខ្យល់បក់ខ្លាំងនៅពេលថ្ងៃរះ ។



 ទីភ្នាក់ងារព័ត៌មានក្នុងស្រុក Adnkronos រាយការណ៍ថា ទូកមួយគ្រឿងនេះ បានដឹកជនជាតិកាត់សាសន៍អង់គ្លេស-បារាំង ២នាក់ ជនជាតិអៀកឡង់ម្នាក់ នូវែលសេឡង់ម្នាក់ និងស្រីលង្កាម្នាក់ ក្រៅពីនោះគឺជាជនជាតិអង់គ្លេស ។

 ក្រុមអ្នកមុជទឹកមកពីនាយករដ្ឋពន្លត់អគ្គិភ័យអ៊ីតាលី កំពុងបន្តស្វែងរកនៅជុំវិញទូក ដែលបច្ចុប្បន្នបានលិចក្នុងជម្រៅទឹកប្រហែល ៥០ម៉ែត្រ និងមានចម្ងាយប្រហែលជាងកន្លះគ.មពីតំបន់ឆ្នេរ ។

 ក្រសួងការបរទេសអង់គ្លេស ពុំបានឆ្លើយតបភ្លាមៗនោះទេ ចំពោះសំណើរសុំសេចក្តីអត្ថាធិប្បាយ ៕