ក្រសួងការបរទេសចិន ប្រកាសឲ្យដឹងនៅក្នុងសន្និសីទសារព័ត៌មាននាថ្ងៃចន្ទនេះថា នាយករដ្ឋមន្រ្តីចិនលោក Li Qiang នឹងធ្វើដំណើរទៅកាន់ប្រទេសរុស្ស៊ី និងបេឡារុស សម្រាប់ដំណើរទស្សនកិច្ចរយៈពេល ៤ថ្ងៃ និងធ្វើជាប្រធានជំនួបលើកទី ២៩រវាងនាយករដ្ឋមន្រ្តីចិន និងរុស្ស៊ី ។

អ្នកនាំពាក្យក្រសួងការបរទេសចិនអ្នកស្រី Mao Ning និយាយថា ដំណើរទស្សនកិច្ចរបស់លោក Li ចាប់ពីថ្ងៃអង្គារស្អែកតទៅ គឺជាការអញ្ជើញរបស់នាយករដ្ឋមន្រ្តីរុស្ស៊ីលោក Mikhail Mishustin និងនាយករដ្ឋមន្រ្តីបេឡារុសលោក Roman Golovchenko ក្នុងនោះកិច្ចប្រជុំស៊ីជម្រៅស្តីពីទំនាក់ទំនង និងកិច្ចសហប្រតិបត្តិការទ្វេភាគី ស្ថិតនៅលើរបៀបវារៈ ។

ចិនបានពង្រឹងទំនាក់ទំនងពាណិជ្ជកម្ម និងយោធាជាមួយរុស្ស៊ី ក្នុងរយៈពេលប៉ុន្មានឆ្នាំកន្លងមកនេះ ពេលដែលសហរដ្ឋអាមេរិក និងសម្ព័ន្ធមិត្តរបស់ពួកគេដាក់ទណ្ឌកម្មលើប្រទេសទាំង ២ ប៉ុន្តែជាពិសេសគឺទីក្រុងម៉ូស្គូ សម្រាប់ការវាយលុករបស់ពួកគេនៅអ៊ុយក្រែន ។

ដោយឡែក បេឡារុស ប្រឈមទណ្ឌកម្មដូចគ្នាពីសហរដ្ឋអាមេរិក សហភាពអឺរ៉ុប អង់គ្លេស កាណាដា ហូឡង់ ហើយនិងប្រទេសជាច្រើនទៀត ជុំវិញការគាំទ្ររបស់ពួកគេលើការវាយលុករបស់រុស្ស៊ីនៅអ៊ុយក្រែន ៕