អង់គ្លេស៖ នាយករដ្ឋមន្ត្រីអង់គ្លេស លោក Boris Johnson នឹងដាក់ចេញផែនការរបស់លោកនៅថ្ងៃអង្គារ ទី១៤ ខែកញ្ញាស្អែកនេះដើម្បីគ្រប់គ្រងការរាលដាលវីរុសកូវីដ-១៩ នៅខែរដូវរងា ដោយប្រកាសពីការសម្រេចលុបចោលការណែនាំអំពីលិខិតឆ្លងដែនវ៉ាក់សាំង និងជំហានដើម្បីបញ្ចប់អំណាចដាក់រដ្ឋក្នុងគ្រាអាសន្នមួយចំនួន។
លោក Johnson កំពុងរងការរិះគន់ពីមន្ត្រីមួយចំនួននៅក្នុងគណបក្សអភិរក្សនិយមរបស់លោក ចំពោះការដំឡើងពន្ធដើម្បីដោះស្រាយបញ្ហាវិបត្តិសេដ្ឋកិច្ច និងសង្គម ដែលនាំឲ្យមានការកំណត់ថានឹងបន្ធូរបន្ថយការរិះគន់ទាំងនោះ ដោយបោះបង់ចោលផែនការណែនាំលិខិតឆ្លងដែន ទោះបីជាមានករណីឆ្លងវីរុសកូរ៉ូណាកើនឡើងក៏ដោយ។ ថ្លែងទៅកាន់ប្រព័ន្ធផ្សព្វផ្សាយរដ្ឋមន្ត្រីក្រសួងសុខាភិបាល លោក Sajid Javid បាននិយាយថា លោកមិនបានគិតទុកជាមុនអំពីវិធានការទប់ស្កាត់បន្ថែមទេ ហើយលិខិតឆ្លងដែនវ៉ាក់សាំងនឹងមិនត្រូវបានណែនាំនៅក្នុងប្រទេសអង់គ្លេសដែរ ខណៈរដ្ឋាភិបាលពឹងផ្អែកលើវ៉ាក់សាំង និងតេស្តដើម្បីការពារសាធារណជន។
លោ Javid បានប្រាប់ព័ត៌មាន Sky News ថា បច្ចុប្បន្ននេះយើងកំពុងឈានចូលរដូវកាលស្លឹកឈើជ្រុះ និងរដូវរងា នាយករដ្ឋមន្ត្រីនៅសប្ដាហ៍នេះនឹងរៀបចំផែនការដើម្បីគ្រប់គ្រងវីរុស COVID ក្នុងរយៈពេលប៉ុន្មានខែខាងមុខនេះ ហើយយើងនឹងបញ្ជាក់ឱ្យច្បាស់ថា កម្មវិធីវ៉ាក់សាំងរបស់យើងកំពុងដំណើរការហើយ។ រហូតមកដល់ពេលនេះចក្រភពអង់គ្លេសមានករណីឆ្លងវីរុស COVID-19 ចំនួន៧,២២៦,២៧៦ករណី និងមានអ្នកស្លាប់ ១៣៤,២០០នាក់៕
អត្ថបទ៖ ប៊ុន ថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
