កងពលតូចប្រដាប់អាវុធ al-Qassam របស់ក្រុមហាម៉ាស នៅថ្ងៃចន្ទ (ទី១៩ ខែសីហា) បានអះអាងទទួលខុសត្រូវ ចំពោះការបំផ្ទុះគ្រាប់បែក នៅទីក្រុង Tel Aviv កាលពីថ្ងៃអាទិត្យ (ទី១៨ ខែសីហា) ដែលបានបណ្តាលឲ្យមនុស្សម្នាក់រងរបួស និងជំរុញឲ្យមានការប្រុងប្រយ័ត្នខ្ពស់ នៅទូទាំងប្រទេសអ៊ីស្រាអែល។

ក្រុមហាម៉ាស បាននិយាយថា ខ្លួនបានធ្វើប្រតិបត្តិការយោធា ដោយសហការជាមួយអង្គភាពប្រដាប់អាវុធរបស់ចលនាជីហាតអ៊ិស្លាម គឺកងពលតូច Al Quds។

នៅថ្ងៃទី១៩ ខែសីហានេះ នគរបាលអ៊ីស្រាអែល បានប្រាប់ថា ការបំផ្ទុះនេះ ជា«ការវាយប្រហារភេរវកម្ម»។ ពួកគេបានឲ្យដឹងនៅក្នុងសេចក្តីថ្លែងការណ៍មួយថា «នេះគឺជាការវាយប្រហារភេរវកម្ម ដែលពាក់ព័ន្ធនឹងការបំផ្ទុះគ្រឿងផ្ទុះដ៏ខ្លាំងក្លាមួយ»។

ហើយកាលពីថ្ងៃទី១៨ ខែសីហា អាជ្ញាធរបានរាយការណ៍ថា ការបំផ្ទុះនៅក្នុងមជ្ឈមណ្ឌលពាណិជ្ជកម្មរបស់ទីក្រុង Tel Aviv បានសម្លាប់មនុស្សម្នាក់ ដែលត្រូវបានប្រព័ន្ធផ្សព្វផ្សាយអ៊ីស្រាអែលកំណត់អត្តសញ្ញាណថា ជាជនសង្ស័យនៃការវាយប្រហារនោះ។

គួរបញ្ជាក់ថា ការបំផ្ទុះ នាយប់ថ្ងៃទី១៨ ខែសីហា បានកើតឡើងភ្លាមៗ ក្រោយរដ្ឋមន្ត្រីការបរទេសអាមេរិក លោក Antony Blinken បានទៅដល់ទីក្រុង Tel Aviv ដើម្បីជំរុញឲ្យមានបទឈប់បាញ់ នៅតំបន់ហ្កាហ្សា បន្ទាប់ពីមានសង្គ្រាមជាង ១០ខែ និងខណៈដែលមានការភ័យខ្លាចពីការកើនឡើងនូវភ្លើងសង្គ្រាមក្នុងតំបន់កាន់តែធំឡើងៗ៕