​បាល់ទាត់៖ ​ខ្សែការពារ​កណ្តាល​សញ្ជាតិ​ប្រេ​ស៊ី​ល David Luiz រកបាន​ទ្រនំ​ហើយ​គឺ​ត្រលប់​ទៅ​ទឹកដី​កំណើត​របស់ខ្លួន​វិញ​ ដោយ​ចុះហត្ថលេខា​លេង​ឱ្យ​ក្លិប​ Flamengo នៅ​ក្របខណ្ឌ​លី​គ​កំពូល Brazil Serie A​។

​​ក្លិប​បាល់ទាត់​ដែលមាន​រហ័ស​នាម Rubro-Negro មួយ​នេះ​បានប្រកាស​កាលពី​ចុង​សប្តាហ៍​កន្លងទៅ​ ពី​ការមកដល់របស់​កីឡាករ​វ័យ ៣៤ឆ្នាំ​រូបនេះ​។ ​កិច្ចសន្យា​រយៈពេល ១៦ខែ​ត្រូវបាន​យល់ព្រម​ដោយ​ភាគី​ទាំងពីរ​ដែល​មានន័យថា David Luiz នឹង​លេង​ឱ្យ Flamengo រហូតដល់​ចប់​រដូវ​កាល ២០២២​។​ ​David Luiz បាន​នៅ​ទំនេរ​ពី​បាល់ទាត់​ក្រោយ​ចាក​ចេញពី Arsenal កាលពី​ខែមិថុនា​ក្រោយ​កិច្ចសន្យា​អស់​សុពលភាព​។ ​នេះ​ជាការ​ត្រលប់​ទៅ​ទឹកដី​កំណើត​វិញ​ក្រោយពី​ចាកចេញ​អស់​រយៈ​ពេល ១៤ឆ្នាំ​សំរាប់ David Luiz ដែល​ចាក​ចេញពី​ក្លិប​ Vitoria ទៅកាន់​ក្លិប​ព័រទុយហ្កាល់ Benfica ត្រឹម​កិច្ចសន្យាខ្ចី​។​

​​រយៈពេល ១៤ឆ្នាំ​នៅ​អឺរ៉ុប​នោះ David Luiz បានឈ្នះ​ជើងឯក​នៅ​លី​គ​កំពូល​ព័រទុយហ្កាល់​ជាមួយ Benfica, ឈ្នះ​ជើងឯក English Premier League ជាមួយ Chelsea, ឈ្នះ​ជើងឯក​បារាំង Ligue 1 ជាមួយ Paris Saint Germain, ឈ្នះ​ជើងឯក FA Cup ៣លើករួមជាមួយ UEFA Champions League និង UEFA Europa League ផងដែរ​៕

​អត្ថបទ​៖​នាង សុភា​វុ​ធ