ក្រសួងការបរទេសឥណ្ឌា នៅថ្ងៃចន្ទ (ទី១៩ ខែសីហា) នេះ បានប្រាប់ឲ្យដឹងថា នាយករដ្ឋមន្ត្រីឥណ្ឌា លោក Narendra Modi នឹងធ្វើទស្សនកិច្ចនៅអ៊ុយក្រែន ដែលជាដំណើរលើកដំបូងរបស់លោកទៅកាន់ប្រទេសដែលហែកហួរដោយសង្រ្គាមមួយនេះ គិតចាប់តាំងពីមានជម្លោះជាមួយរុស្ស៊ី និងមានរយៈពេលប្រហែលមួយខែបន្ទាប់ពីលោកបានជួបជាមួយប្រធានាធិបតីរុស្ស៊ី លោក Vladimir Putin នៅទីក្រុងមូស្គូ។

ក្រសួងការបរទេស បានឲ្យដឹងថា ព័ត៌មានលម្អិតនៃការធ្វើដំណើរនេះ នឹងត្រូវចែករំលែក នាពេលក្រោយ ដោយបន្ថែមទៀតថា លោក Modi នឹងទៅបំពេញទស្សនកិច្ច នៅប្រទេសប៉ូឡូញផងដែរ។ ហើយប្រព័ន្ធផ្សព្វផ្សាយឥណ្ឌា បានរាយការណ៍ថា លោក Modi ត្រូវបានគេរំពឹងថា នឹងធ្វើទស្សនកិច្ចប្រទេសទាំង២ ប្រហែលជាចាប់ពីថ្ងៃទី២១ ដល់ថ្ងៃទី២៣ ខែសីហា។

អ្នកវិភាគឥណ្ឌា បានលើកឡើងថា ដំណើរទស្សនកិច្ចនៅទីក្រុងគីវរបស់លោក Modi នេះ នឹងមានគោលបំណងប៉ះប៉ូវដល់ផលប៉ះពាល់អវិជ្ជមាន អំឡុងការធ្វើដំណើររបស់លោកទៅកាន់ទីក្រុងមូស្គូ ដែលបានកើតឡើងស្របពេលជាមួយនឹងការវាយប្រហារដ៍សាហាវទៅលើមន្ទីរពេទ្យកុមារ ក្នុងរដ្ឋធានីរបស់អ៊ុយក្រែន ដែលហេតុការណ៍នោះធ្វើឲ្យលោកមានភាពអាម៉ាស់ និងនាំឲ្យមានការរិះគន់យ៉ាងខ្លាំងពីប្រធានាធិបតីអ៊ុយក្រែន លោក Volodymyr Zelensky។

លោក Modi បានធ្វើដំណើរទៅកាន់ទីក្រុងមូស្គូពីថ្ងៃទី៨ ដល់ទី ៩ ខែកក្កដា ជាពេលវេលាដែលមិត្តចាស់ទាំង២ គឺឥណ្ឌា និងរុស្ស៊ី បានស្វែងរកការជំរុញពាណិជ្ជកម្ម និងកិច្ចសហប្រតិបត្តិការទ្វេភាគី ក្នុងវិស័យនានា រាប់ចាប់ពីថាមពលនុយក្លេអ៊ែរ ដល់ថ្នាំពេទ្យ៕