ភ្នំពេញ៖ ចំនួនអ្នកឆ្លងមេរោគកូវីដ-១៩នៅប្រទេសកម្ពុជា បានកើនឡើងលើស ១០ម៉ឺននាក់ហើយនៅថ្ងៃនេះ បន្ទាប់ពីកម្ពុជារកឃើញអ្នកឆ្លងថ្មីចំនួនជាង ៦០០នាក់បន្ថែមទៀត។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបញ្ជាក់ថា មនុស្ស ៦២៩នាក់ទៀត ត្រូវបានរកឃើញឆ្លងមេរោគកូវីដ-១៩កាលពីថ្ងៃម្សិលមិញនេះ ក្នុងនោះករណីឆ្លងចំនួន ១១៣នាក់ ត្រូវបានរកឃើញលើអ្នកដំណើរមកពីក្រៅប្រទេស។
គិតត្រឹមថ្ងៃនេះ តួលេខអ្នកឆ្លងមេរោគកូវីដ-១៩សរុប បានកើនដល់ចំនួន ១០០,១៣៣នាក់ហើយនៅទូទាំងប្រទេស គិតចាប់តាំងពីកម្ពុជារកឃើញករណីឆ្លងដំបូងកាលពីចុងខែមករាឆ្នាំមុន។
បើតាមតួលេខរបស់ក្រសួងសុខាភិបាល មនុស្សរហូតដល់ទៅ ៩៩,៥៩៧នាក់ ឬស្មើ ៩៩.៤៨ភាគរយនៃតួលេខអ្នកឆ្លងសរុប ត្រូវបានរកឃើញឆ្លងមេរោគកូវីដ-១៩នៅចាប់ពីថ្ងៃទី២០ ខែកុម្ភៈកន្លងមកនេះ ឬក្រោយផ្ទុះការឆ្លងក្នុងសហគមន៍ ២០កុម្ភៈ។
ចំណែកឯតួលេខអ្នកស្លាប់វិញ ក្រសួងសុខាភិបាលបញ្ជាក់ថា បានកើនឡើងដល់ ២,០៤៩នាក់ហើយ ក្នុងនោះមានទាំងករណីស្លាប់ថ្មីចំនួន ៩នាក់ដែលក្រសួងទើបប្រកាសនៅថ្ងៃនេះផងដែរ។
ទោះជាយ៉ាងណា ក្រសួងបញ្ជាក់ថា អ្នកជំងឺកូវីដ-១៩ចំនួន ៩៤,៣២៦នាក់ ឬស្មើជាង ៩៤ភាគរយនៃតួលេខអ្នកឆ្លងសរុប ត្រូវបានព្យាបាលជាសះស្បើយឡើងវិញ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
