បេក្ខជនប្រធានាធិបតីគណបក្សសាធារណរដ្ឋ លោក Donald Trump កាលពីថ្ងៃចន្ទ បានបញ្ជាក់ជាថ្មីថា លោកនឹងបិទការទិញដែកថែបអាមេរិកតាមផែនការរបស់ក្រុមហ៊ុន Nippon Steel និងមានចំណាត់ការលុបចោលច្បាប់បំពុលដោយរោងចក្រថាមពលរបស់រដ្ឋបាល លោក Biden ។

លោក Trump កាលពីខែកុម្ភៈ បានផ្តល់សញ្ញាថា លោកនឹងមានចំណាត់ការបិទកិច្ចព្រមព្រៀងនេះ។ យោងតាមសុន្ទរកថាដែលបានរៀបចំចេញផ្សាយដោយយុទ្ធនាការ បានឲ្យដឹងថា លោក Trump នឹងនិយាយទៅកាន់កម្មករនៅទីក្រុង York រដ្ឋ Pennsylvania ថា ប្រសិនបើជាប់ឆ្នោតលោក «នឹងបញ្ឈប់ប្រទេសជប៉ុនពីការទិញដែកថែបរបស់សហរដ្ឋអាមេរិក»។

ភាគហ៊ុននៅក្នុងក្រុមហ៊ុនដែកថែបសហរដ្ឋអាមេរិក បានធ្លាក់ចុះ ហើយការធ្លាក់ចុះនេះមានឡើងបន្ទាប់ពីការសុន្ទរកថា ដែលបានគ្រោងទុករបស់លោក Trump ត្រូវបានរាយការណ៍ ហើយកាលពីពេលថ្មីៗនេះ ការជួញដូរបានធ្លាក់ចុះ ៣,៥% ។ ប្រធានាធិបតី លោក Joe Biden កាលពីខែមីនា បាននិយាយថា វាមានសារៈសំខាន់ខ្លាំងសម្រាប់ក្រុមហ៊ុនដែកថែបអាមេរិក(US Steel) នៅតែជាក្រុមហ៊ុនគ្រប់គ្រង និងដំណើរការក្នុងស្រុក។

កាលពីខែមេសា ទីភ្នាក់ងារការពារបរិស្ថាន បានចេញផ្សាយច្បាប់ចុងក្រោយដែលផ្តោតលើការបំពុលកាបូន ខ្យល់ និងទឹក ពីរោងចក្រថាមពល ដែលទីភ្នាក់ងារនិយាយថា អាចកាត់បន្ថយការបំភាយឧស្ម័នផ្ទះកញ្ចក់បានជាង១ពាន់លានតោន នៅឆ្នាំ២០៤៧។

ទីភ្នាក់ងារ និយាយថា វិស័យអគ្គិសនី មានជិតមួយភាគបួននៃឧស្ម័នផ្ទះកញ្ចក់របស់សហរដ្ឋអាមេរិក។

លោក Trump បានហៅការគ្រប់គ្រងនេះថាជាផ្នែកនៃ «ចលនាថាមពលប្រឆាំងអាមេរិក» ដែលលោកនឹងព្យាយាមលុបចោល និង ដាក់ជំនួសការបិទរោងចក្រថាមពល។ លោកក៏បានប្តេជ្ញាថា នឹងទប់ស្កាត់ការផ្លាស់ប្តូរនោះ ទៅជារថយន្តអគ្គិសនីកាន់តែច្រើនបន្ថែមទៀត ដែលរដ្ឋបាល លោក Biden បានការពារ។

លោក Trump ក៏បានប្តេជ្ញាសើរើឡើងវិញឋានៈពាណិជ្ជកម្មប្រទេសដែលអនុគ្រោះបំផុតរបស់ចិន និងស្វែងរកច្បាប់ដើម្បីធ្វើឱ្យប្រទេសចិន ឬប្រទេសផ្សេងទៀតបង់ពន្ធទៅវិញទៅមក ប្រសិនបើពួកគេដាក់ពន្ធថ្មី។