អ្នកនាំពាក្យក្រសួងអប់រំយុវជន និងកីឡា បានឲ្យដឹងថា បច្ចុប្បន្ន ក្រសួងអប់រំ បាន​ដាក់​បញ្ចូល​ចំណេះដឹ​ងទាក់ទងអាស៊ាន ក៏ដូចជាសារៈសំខាន់នៃកិច្ចសហប្រតិបត្តិកាជាមួយប្រទេសក្នុងតំបន់ និង​ពិភពលោក នៅក្នុងកម្មវិធីសិក្សានៅតាមសាលារៀនរដ្ឋតាំងពីយូរមកហើយ ហើយ​តាម​រយៈ​ការ​សិក្សា​ចំណេះដឹងទាក់ទងនឹងអាស៊ាននេះ ធ្វើឲ្យសិស្សានុសិស្ស​ទូទាំង​បាន​យល់​ដឹង​ការងារ​ក្រប​ខណ្ឌ​កិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA ផងដែរ។

អ្នកនាំពាក្យក្រសួងអប់រំយុវជន និងកីឡា លោកស្រី ឃួន វិច្ឆិកា ថ្លែងប្រាប់ BTV ថ្ងៃទី២០ ខែ​សីហា​នេះ​ថា  នៅក្នុងមុខវិជ្ជាសិក្សាសង្គម ភាសាខ្មែរ ប្រវត្តិវិទ្យា និងភូមិវិទ្យាក៏មាន​ចំណេះដឹ​ង​ស្តីពី​ភូមិ​សាស្ត្រ ប្រវត្តិសាស្ត្រ និងពលរដ្ឋសាកល ទាក់ទងនឹងអាស៊ាន និងសហប្រតិបត្តិការ​ក្នុង​តំបន់​ដែរ ដែលអាចឱ្យសិស្សានុសិស្សទាំងអស់គ្នា បានមើលឃើញពីសារៈសំខាន់ នៃកិច្ចសហ​ប្រតិបត្តិការ​​រវាងប្រទេសក្នុងតំបន់ ជាពិសេសក្របខណ្ឌ​កិច្ច​សហ​ប្រតិបត្តិការ​តំបន់ត្រីកោណ អភិវឌ្ឍន៍​ កម្ពុជា ឡាវ វៀតណាម CLV DTAផងដែរ។

បណ្តាសិស្សថ្នាក់ទី១២ នៃវិទ្យាល័យហ៊ុន សែនតាខ្មៅ បានអះអាងថា ចំណេះដឹងទាក់ទង​អាស៊ាន និងការងារកិច្ចសហប្រតិបត្តិការរវាងប្រទេស និងប្រទេស ជាពិសេសការងារ​កិច្ច​សហ​ប្រតិបត្តិការ​តំបន់ត្រីកោណអភិវឌ្ឍន៍ CLV DTA ជាដើមនោះ ពួកគេបានយល់ដឹង និងបានរៀន​សូត្រ​តាំង​ពី​ថ្នាក់អនុវិទ្យាល័យរហូតដល់វិទ្យាល័យថ្នាក់ទី១០ ទី១១ និងថ្នាក់ទី១២ថែមទៀត។

សិស្សានុសិស្ស បានសម្ដែងការសោកស្ដាយ​ដែលអ្នក​នយោបាយ​ជ្រុលនិយម​នៅ​ក្រៅ​ប្រទេស​ខិតខំ​និយាយ​ប្រឌិតរឿង CLV DTA ខុសពីការពិតទាំងស្រុង។ ពួកគេយល់ថា អ្នកនយោបាយ​ប្រឆាំង​ក្រៅ​ស្រុក តែងតែបង្កើតអំពើញុះញង់ឲ្យជាតិបែកបាក់គ្នា ខណៈកិច្ចសហប្រតិបត្តិការ CLV DTA បានចូលរួមការពារអធិបតេយ្យភាព និងបូរណភាពទឹកដីរឹងមាំរៀងរហូត ពិសេស​ការ​ធានា​និរន្តរភាព​នៃសន្តិភាព និងការអភិវឌ្ឍន៍គ្រប់ជ្រុងជ្រោយដល់ប្រជាជាតិកម្ពុជា និងបណ្តាពលរដ្ឋ​នៅ​ក្នុងខេត្តអភិវឌ្ឍទាំងបួននោះ៕ អត្ថបទ ស៊ុម សុខជា