តំណាងសហជីពថ្នាក់ជាតិ និងសហជីពមូលដ្ឋានតាមបណ្តារោងចក្រ ក្រុមហ៊ុនអ្នកបញ្ជាទិញ នៅថ្ងៃទី២០ ខែសីហានេះ បានចូលរួមកិច្ចប្រជុំក្រុមការងារសហជីពស្តីពី «ការលើក​កម្ពស់​សុវត្ថិភាព​ចរាចរណ៍សម្រាប់កម្មករនិយោជិតកម្ពុជា» ដើម្បីស្វែងរកមធ្យោបាយ និងយន្តការ​របស់​កម្មករ​និយោជិតក្នុងវិស័យកាត់ដេរ។

លោក គឹម បញ្ញា នាយកអង្គការមូលនិធិបង្ការបួសអាស៊ីប្រចាំនៅកម្ពុជា បានមានប្រសាសន៍ថា កិច្ច​ប្រជុំនេះមានគោលបំណងស្វែងយល់អំពីស្ថានភាពនាពេលបច្ចុប្បន្ននៃការរាយការណ៍កង្វល់ ជំរុញការចូលរួមរបស់សហជីពក្នុងការសន្ទនាដើម្បីធ្វើឱ្យកាន់តែប្រសើរឡើងនូវការចូលរួមរបស់សហជីព​ក្នុងដំណើការលើកឡើងអំពីកង្វល់នានាក្នុងពេលធ្វើដំណើររបស់កម្មករនិយោជិត ទាំងនៅ​កម្រិត​រោង​ចក្រ និងថ្នាក់ជាតិ ហើយលើកទឹកចិត្ត​ឱ្យសហជីពដាក់បញ្ចូលកង្វល់ក្នុង​ពេល​ធ្វើ​ដំណើរ​លើក​ឡើងដោយកម្មករនិយោជិតក្នុងរបៀបវារៈកិច្ចប្រជុំថ្នាក់ជាតិ។

អ្នកស្រី សួន សុគន្ធា សហព័ន្ធសហជីពជាតិ នៃឧស្សាហកម្មវាយនភ័ណ្ឌកាត់ដេរកម្ពុជា បាន​និយាយថា ទោះជាមានការខិតខំប្រឹងប្រែងពីរាជរដ្ឋាភិបាល និងភាគីពាក់ព័ន្ធ ក្នុងការ​លើក​កម្ពស់​សុវត្ថិភាព​ចរាចរណ៍ដល់ប្រជាពលរដ្ឋតាមរយៈការផ្សព្វផ្សាយ យ៉ាងណាក៏ដោយ ក្តីកង្វល់​របស់​អ្នក​ប្រើ​ប្រាស់ផ្លូវ ជាពិសេសកម្មករនិយោជិត ក៏តែមានចំនួនច្រើន។ ហេតុនេះ​ទើប​អង្គការ​សហជីព បានបន្តចូលរួមចំកិច្ចប្រជុំបែបនេះ ដើម្បីលើកកម្ពស់ការធ្វើដំណើររបស់កម្មករនិយោជិត ។

យោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកកម្ពុជា អ្នកស្លាប់​ដោយ​សារ​គ្រោះថ្នាក់ចរាចរណ៍ក្នុងរយៈពេល ៦ខែ ឆ្នាំ២០២៤ មានចំនួនជិត ៨០០នាក់ ចំនួន​នេះ​មានការកើនឡើងប្រមាណ៥% បើធៀបនឹងរយៈពេលដូចគ្នាក្នុងឆ្នាំ២០២៣។ ជាមួយនេះ បើ​យោងតាមរបាយការណ៍បេឡាជាតិសន្តិសុខសង្គម បានបង្ហាញថា កម្មករ​និយោជិត​វិស័យ​រោង​ចក្រ សហគ្រាស គ្រឹះស្ថាន ដែលបានស្លាប់ដោយសារគ្រោះថ្នាក់ ចរាចរណ៍​ពេល​ធ្វើ​ដំណើរ​ទៅ​មក​បំពេញ​ការងារ​នៅក្នុងរយៈពេល ៦ខែដូចគ្នា មានការកើនឡើងប្រមាណ ២០% បើធៀប​រយៈ​ពេល​​ដូចគ្នាក្នុងឆ្នាំ២០២៣។ តាមលទ្ធផលនេះសុវត្ថិភាពរបស់កម្មករនិយោជិតនៅតែជាបញ្ហាប្រឈម ក្នុងនោះរួម​មាន​គ្រោះ​ថ្នាក់​ពេលធ្វើដំណើរទៅមកបំពេញការងារដែលបណ្តាល ឱ្យមានអ្នកស្លាប់ និង​របួស​ក្នុង​ចំនួន​ច្រើន​។ ជារៀងរាល់ថ្ងៃការធ្វើដំណើរទៅ និងមកពីការងារ​ជា​រៀង​រាល់​ថ្ងៃ​បាន​ធ្វើ​ឲ្យ​ជីវិត​កម្មករ​រោង​ចក្រ​កាត់​ដេរ និងស្បែកជើងជាង ៨៧ម៉ឺននាក់ ដែលកំពុងធ្វើការនៅរោងចក្រជាង ១ពាន់ នៅ​ទូទាំងប្រទេសជួបគ្រោះថ្នាក់៕ អត្ថបទ ឈិត បូរ៉ាវី