លោកប្រធានាធិបតីអ៊ុយក្រែន Volodymyr Zelensky បាននិយាយកាលពីថ្ងៃចន្ទថា ការវាយលុករបស់ប្រទេសលោកលើតំបន់ឃើស (Kursk) របស់រុស្ស៊ី បានបង្ហាញថា ការគំរាមកំហែងរបស់វិមានក្រឹមឡាំងពីការសងសឹកបានត្រឹមតែមាត់ប៉ុណ្ណោះ ហើយលោកបានជំរុញឱ្យសម្ព័ន្ធមិត្តរបស់ទីក្រុង Kyiv បន្ធូរបន្ថយការរឹត្បិតប្រើប្រាស់អាវុធ ដែលផ្គត់ផ្គង់ដោយសម្ព័ន្ធមិត្តលោកខាងលិច។

លោក Zelensky បាននិយាយថា កងកម្លាំងអ៊ុយក្រែនពេលនេះបានគ្រប់គ្រងលើផ្ទៃដីជាង១.២៥០ គីឡូម៉ែត្រក្រឡា និងភូមិប្រមាណ៩២ នៅក្នុងតំបន់ឃើស ខណៈប្រទេសរុស្ស៊ីបាននិយាយថា អ៊ុយក្រែនបានវាយប្រហារស្ពានទីបីនៅក្នុងតំបន់នេះ ដែលបង្កឲ្យមានភាពស្មុគស្មាញដល់កិច្ចខិតខំប្រឹងប្រែងរបស់រុស្ស៊ីដើម្បីទប់ទល់នឹងការវាយប្រហាររបស់អ៊ុយក្រែន។

អ៊ុយក្រែនបានចាប់ផ្តើមការវាយប្រហារដ៏គួរឱ្យភ្ញាក់ផ្អើលរបស់ខ្លួនទៅលើតំបន់នេះរបស់រុស្ស៊ីកាលពីថ្ងៃទី ៦ ខែសីហា ដែលជាការឈ្លានពានដ៏ធំបំផុតចូលទឹកដីរុស្ស៊ីចាប់តាំងពីសង្គ្រាមលោកលើកទីពីរក្នុងប្រតិបត្តិការ ដែលទីក្រុង Kyiv និយាយថាមានគោលបំណងដណ្ដើមយកតំបន់និងធ្វើជាតំបន់ទ្រនាប់ និងបញ្ឈប់ម៉ាស៊ីនសង្រ្គាមរបស់រុស្ស៊ី។

ថ្លែងទៅកាន់ការប្រមូលផ្តុំអ្នកការទូតអ៊ុយក្រែន លោក Zelensky បានលើកឡើងពីសម្ព័ន្ធមិត្តដែលបានផ្គត់ផ្គង់អាវុធរយៈចម្ងាយឆ្ងាយ ប៉ុន្តែបានប្រាប់ទីក្រុង Kyiv ថា អាវុធទាំងនោះមិនអាចប្រើប្រាស់វាឱ្យជ្រៅនៅក្នុងប្រទេសរុស្ស៊ីបានទេ ដោយសារខ្លាចឆ្លងបន្ទាត់ក្រហម ដែលកំណត់ដោយលោកប្រធានាធិបតីរុស្ស៊ី Vladimir Putin ដែលលោក Zelenskyនិយាយថាការកំណត់បន្ទាត់ក្រហមនេះបានត្រឹមតែមាត់៕