ប្រទេសបេឡារុស បាននិយាយកាលពីថ្ងៃចន្ទ (១៩ សីហា) ថា ខ្លួនបានបញ្ជូនយន្តហោះ កងកម្លាំងការពារដែនអាកាស និងគ្រឿងសព្វាវុធបន្ថែមទៀតទៅកាន់ព្រំដែនរបស់ខ្លួនជាមួយអ៊ុយក្រែន មួយថ្ងៃបន្ទាប់ពីលោកប្រធានាធិបតី អាឡិចសាន់ដឺ លូកាស៊ិនកូ (Alexander Lukashenko) បាននិយាយថាលោកបានដាក់ពង្រាយជិតមួយភាគបីនៃកងកម្លាំងប្រដាប់អាវុធរបស់ប្រទេសបេឡារុសទៅកាន់តំបន់ព្រំដែន។

មេបញ្ជាការកងទ័ពអាកាស និងការពារដែនអាកាសបេឡារុស លោក អាន់ឌ្រី លូកយ៉ានូវវ៉ិច (Andrei Lukyanovich) បានប្រាប់ទូរទស្សន៍រដ្ឋ CTV ថា «កងកម្លាំងត្រូវបានបង្កើនគួរឱ្យកត់សម្គាល់ ហើយនៅពេលនេះពួកគេកំពុងបំពេញកាតព្វកិច្ចនៅព្រំដែនភាគខាងត្បូងរបស់ប្រទេស»។ លោក Lukyanovich បន្ថែមថា កងអាកាសចរណ៍ កងកម្លាំងមីស៊ីលប្រឆាំងយន្តហោះ និងកងទ័ពបច្ចេកទេសវិទ្យុ ត្រូវបានដាក់ពង្រាយទៅកាន់ព្រំដែន។

ប៉ុន្មានថ្ងៃបន្ទាប់ពីការវាយលុកដ៏គួរឱ្យភ្ញាក់ផ្អើលរបស់អ៊ុយក្រែន ចូលទៅក្នុងទឹកដីរបស់រុស្ស៊ី មេដឹកនាំបេឡារុស លោក Lukashenko ដែលជាសម្ព័ន្ធមិត្តដ៏ស្មោះត្រង់របស់លោកប្រធានាធិបតី វ្ល៉ាឌីមៀ ពូទីន (Vladimir Putin) បានចោទប្រកាន់ទីក្រុងគីវ ពីគោលនយោបាយឈ្លានពាន និងបានបញ្ជូនកងទ័ពរបស់ខ្លួនជាង ១២០.០០០នាក់ទៅកាន់ព្រំដែន។

អ៊ុយក្រែន បាននិយាយថា ខ្លួនមិនបានមើលឃើញការកើនឡើងនៃកងទ័ពបេឡារុសនៅតាមព្រំដែនទេ ហើយបានហៅសេចក្តីថ្លែងការណ៍របស់លោក Lukashenko ថាជា «វោហាសាស្ត្រវាយប្រហារ» ក្នុងគោលបំណងដើម្បីផ្គាប់ចិត្តលោក ពូទីន ដែលបានប្រើបេឡារុសជាទ្រនាប់ចាប់ផ្តើមប្រតិបត្តិការយោធាពិសេសរបស់ខ្លួន លើអ៊ុយក្រែនក្នុងខែកុម្ភៈ ឆ្នាំ២០២២៕