​វៀតណាម៖ នាយករដ្ឋមន្ត្រី​វៀតណាម លោក Phạm Minh Chính បាន​ព្រមាន​ដល់​ក្រុម​អាជីវកម្មមិន​ត្រូវ​ប្រញាប់ប្រញាល់​បន្ត​សកម្មភាព​នោះ​ទេ ព្រោះ​ការ​ប្រយុទ្ធ​ប្រឆាំង​វីរុស COVID-19 បាន​បង្ហាញ​សញ្ញា​វិជ្ជមាន​ជា​លើកដំបូង​។

លោកនាយក​រដ្ឋមន្ត្រី​បាន​ចេញ​បញ្ជា​បែបនេះ ខណៈ​កំពុង​ដឹកនាំ​កិច្ចប្រជុំ​គណៈកម្មាធិការ​ជាតិ​សម្រាប់​ការគ្រប់គ្រង និង​បង្ការ​វីរុស COVID-19 ដើម្បី​ពិនិត្យ​ឡើង​វិញការងារ​កាលពី​សប្ដាហ៍​មុន និង​បាន​គូស​បញ្ជាក់​ពី​វិធាន​ការ​ និង​ភារកិច្ច​ស្របតាម​ស្ថានភាព​ជំងឺ​រាត​ត្បាត​បច្ចុប្បន្ន​។ យោង​តាម​គណៈកម្មាធិការ​អចិន្ត្រៃយ៍​ជាតិ​ទទួលបន្ទុក​គ្រប់គ្រង និង​បង្ការ​វីរុស ​COVID-19 បាន​ឲ្យ​ដឹង​ថា ករណី​ឆ្លង​វីរុស​កូ​រ៉ូ​ណា​ថ្មី​នៅ​ក្នុង​សហគមន៍​កាលពី​សប្ដាហ៍​មុន ​បាន​ធ្លាក់​ចុះបើ​ប្រៀបធៀប​ទៅ​នឹង​សប្ដាហ៍​មុន​ៗ ​នៅ​តាម​តំបន់​មួយ​ចំនួន​ដែល​មាន​ករណី​ឆ្លង​ច្រើន រួមមាន​ខេត្ត DaNang ធ្លាក់​ចុះ ៦០%​, ខេត្ត Bình Duong ២៧% និង​ខេត្ត Long An ៣%​។ ចំនួន​អ្នក​ស្លាប់​ប្រចាំថ្ងៃ​នៅ​ទូទាំង​ប្រទេស​ក៏បាន​ធ្លាក់​ចុះ ៣០% ដោយ​ទីក្រុង Ho Chi Minh ធ្លាក់​ចុះ​ ៣០​%, Dong Nai ៥០​% និង​ Long An ៣០%។ គណៈកម្មាធិការ​ដឹកនាំ​បាន​កត់​សម្គាល់​ថា ​ក្នុងចំណោម​ខេត្ត​ក្រុង​ទាំង ២៣ កំពុង​អនុវត្ត​គម្លាត​សង្គម និង​វិធានការ​តឹងរ៉ឹង​។

លោក​បាន​ប្រាប់​ក្រសួង​សុខាភិ​បាល​ឱ្យ​បញ្ចប់​យុទ្ធសាស្ត្ររួម​ឲ្យ​បាន​ឆាប់​ សម្រាប់​ការ​ការពារ ​និង​ទប់ស្កាត់​វីរុស​កូ​វីដ​-១៩ នៅ​ក្នុង​បរិបទ​ថ្មី​ដែល​នឹង​ផ្តោត​លើ​ការ​ចាក់​វ៉ាក់សាំង ការ​ធ្វើ​តេស្ត និង​ការ​ព្យាបាល និង​​បង្កើន​សមត្ថភាព​ឆ្លើយតប​ ដើម្បី​ឱ្យ​ប្រទេស​អាច​វិល​ត្រឡប់​មក​រក​ភាព​ប្រក្រតី​វិញ​នៅ​ឆ្នាំ​២០២២។ ប្រទេស​វៀតណាម​បាន​កត់ត្រា​អ្នក​ឆ្លង​ថ្មី​នៃ​វីរុស ​Covid-19 ចំនួន ១១.៤៧៨​នាក់​គិត​ត្រឹម​ល្ងាច​ថ្ងៃ​អាទិត្យ​ ដែល​នាំ​ឲ្យ​ចំនួន​អ្នក​ឆ្លង​សរុប​នៅ​ប្រទេស​នេះកើន​ឡើង​ដល់ ៦១៣.៣៧​៥​​នាក់ និង​អ្នក​ស្លាប់​សរុប​ចំនួន ១៥.២៧៩​នាក់​ បន្ទាប់ពី​បាន​កត់ត្រា​អ្នក​ស្លាប់​ថ្មី​ចំនួន ២៦១​នាក់​៕​

អត្ថបទ៖ ប៊ុន ថន