ប្រធានាធិបតីអាមេរិក លោក Joe Biden បានថ្លែងសុន្ទរកថាទាំងរំជួលចិត្ត នៅឯសន្និបាតរបស់គណបក្សប្រជាធិបតេយ្យ (DNC) កាលពីថ្ងៃចន្ទ (ទី១៩ ខែសីហា) ដោយលោកប្រកាសថា «អាមេរិក ខ្ញុំស្រឡាញ់អ្នក» ខណៈដែលប្រតិភូ បាននាំគ្នាស្រែកថា «យើងស្រឡាញ់លោក Joe!»។

នៅក្នុងសុន្ទរកថា ដែលអាចចាត់ទុកថា ជាការថ្លែងដ៏ល្អបំផុតមួយ ក្នុងអាជីពរបស់លោកនោះ គឺលោក Biden បានសរសើរអនុប្រធានាធិបតី លោកស្រី Kamala Harris ដោយហៅលោកស្រីថា ជា «ប្រធានាធិបតីទី៤៧ របស់សហរដ្ឋអាមេរិក» ហើយបានរិះគន់លោក Donald Trump បេក្ខជនរបស់គណបក្សសាធារណរដ្ឋថា ជា «អ្នកបរាជ័យ» និង «អ្នកនិយាយភូតកុហក» ដែលយកប្រយោជន៍ «ខ្លួនឯងជាធំ និងអាមេរិកបន្ទាប់»។

ជាមួយគ្នានេះ លោក Biden បានទទួលស្គាល់បញ្ហាប្រឈម ដែលនឹងមាននៅខាងមុខ ដោយលោកថ្លែងថា៖ «ខ្ញុំនៅសល់ពេល ៥ខែទៀត ក្នុងការកាន់តំណែងជាប្រធានាធិបតីរបស់ខ្ញុំ ហើយខ្ញុំមានអ្វីដែលត្រូវធ្វើជាច្រើនទៀត»។ លោកបានដកស្រង់បទភ្លេងអាមេរិករបស់តារាចម្រៀងស្រី Norah Jones ដោយនិយាយថា «អាមេរិក ខ្ញុំបានប្រឹងប្រែងអស់ពីសមត្ថភាពរបស់ខ្ញុំ ដើម្បីអ្នក» ហើយបន្ទាប់មកលោកបានឆ្លុះបញ្ចាំងពីអាជីពដ៏យូរអង្វែងរបស់លោក ដោយលោកទទួលស្គាល់នូវការមានកំហុសឆ្គងដែលមិនអាចចៀសផុត ប៉ុន្តែសង្កត់ធ្ងន់ទៅលើការលះបង់របស់លោក ចំពោះជាតិមាតុភូមិ។

អ្នកចូលរួមសន្និបាតបាននាំគ្នាទះដៃអបអរសាទរ នៅពេលដែលលោក Biden បានប្រគល់តួនាទីតំណាងបក្សទៅឲ្យលោកស្រី Harris ដោយពេលវេលានៃការដឹងគុណដោយឯកឯងបានផ្លាស់ប្តូរ រវាងពួកគេ។ រាត្រីដែលពោរពេញទៅដោយការគោរព ចំពោះបណ្ដាមេដឹកនាំសិទ្ធិស៊ីវិល និងសុន្ទរកថាពីឥស្សរជនលេចធ្លោរបស់គណបក្សប្រជាធិបតេយ្យ បានកត់ចំណាំនូវពេលវេលាដ៏សំខាន់មួយ នៅក្នុងអាជីពរបស់លោក Biden និងអនាគតរបស់គណបក្ស។

លោកស្រី Harris ដែលបានណែនាំខ្លួនជាមួយនឹងវីដេអូដែលបង្ហាញពី »សេរីភាព» របស់អ្នកចម្រៀង Beyoncé បានថ្លែងអំណរគុណដល់លោក Biden សម្រាប់ «ការដឹកនាំជាប្រវត្តិសាស្ត្រ» របស់លោក ខណៈដែលក្រុមមនុស្សនៅតែបន្តស្រែកថា «អរគុណលោក Joe!»។ រាត្រីនេះបានបញ្ចប់ដោយសុន្ទរកថាពីឥស្សរជនផ្សេងទៀត ដូចជាលោកស្រី Hillary Clinton និងលោកស្រី Alexandria Ocasio-Cortez ខណៈដែលគណបក្សប្រជាធិបតេយ្យបានត្រៀមខ្លួនដើម្បីធ្វើដំណើរឆ្ពោះទៅមុខជាមួយលោកស្រី Harris ជាអ្នកកាន់តំណែង។ សូមបញ្ជាក់ថា សន្និបាតរបស់គណបក្សប្រជាធិបតេយ្យនេះ ត្រូវបន្តរហូតដល់ថ្ងៃទី២២ ខែសីហា នៅពេលដែល Harris នឹងទទួលយកការតែងតាំងជាផ្លូវការ៕