ក្រុមអ្នកគាំទ្រគណបក្សប្រជាធិបតេយ្យ កំពុងប្រមូលផ្តុំគ្នានៅទីក្រុង Chicago ដើម្បីអបអរសាទរយុទ្ធនាការរបស់អនុប្រធានាធិបតីអាមេរិក លោកស្រី Kamala Harris ដែលប្រជែងដណ្ដើមកៅអីសេតវិមានទល់នឹងលោក Donald Trump និងដើម្បីផ្ដល់ការគោរពប្រធានាធិបតី លោក Joe Biden ដែលការដកខ្លួនរបស់លោកពីការប្រកួតប្រជែងបានធ្វើឲ្យជោគវាសនារបស់គណបក្សរបស់លោកប្រសើរឡើង។

លោក Biden វ័យ ៨១ឆ្នាំ ដែលបានបញ្ចប់យុទ្ធនាការស្វែងរកការជាប់ឆ្នោតឡើងវិញរបស់លោក កាលពី១ខែមុន ក្រោមសម្ពាធពីសមាជិកជាន់ខ្ពស់គណបក្សប្រជាធិបតេយ្យ ដែលព្រួយបារម្ភថា លោកមានវ័យចាស់ពេក មិនអាចឈ្នះ ឬគ្រប់គ្រងតំណែងរយៈពេល ៤ឆ្នាំទៀតបាននោះ បានថ្លែងសុន្ទរកថាសំខាន់ នៅឯសន្និបាត កាលពីថ្ងៃចន្ទ ដើម្បីបង្ហាញហេតុផល ក្នុងការជ្រើសរើសលោកស្រី Harris និងការមានជ័យជម្នះលើអតីតប្រធានាធិបតីលោក Trump វ័យ ៧៨ឆ្នាំ។

លោកស្រី Harris នឹងទទួលយកការតែងតាំងជាផ្លូវការ នៅយប់ថ្ងៃព្រហស្បតិ៍ជាមួយនឹងសុន្ទរកថាដែលត្រូវបានរំពឹងទុកយ៉ាងខ្លាំងក្លា។ ប្រសិនបើឈ្នះឆ្នោតនៅថ្ងៃទី៥ ខែវិច្ឆិកានោះ លោកស្រី Harris នឹងបង្កើតប្រវត្តិសាស្ត្រអាមេរិក ក្នុងនាមជាប្រធានាធិបតីស្ត្រីដំបូងគេ។

គួរបញ្ជាក់ថា ការស្ទង់មតិមួយខែមុន បានបង្ហាញថា លោក Trump នាំមុខលើលោក Biden ប៉ុន្តែលោកស្រី Harris បានបិទគម្លាតនាំមុខនោះ ទាំងថ្នាក់ជាតិ និងនៅក្នុងរដ្ឋដែលមានការប្រកួតប្រជែងខ្ពស់ជាច្រើន ក្នុងនោះរួមទាំងរដ្ឋ Pennsylvania ដែលនឹងដើរតួនាទីជាការសម្រេច នៅក្នុងការបោះឆ្នោតនេះផងដែរ។

យ៉ាងណាក្ដី ការចាប់ផ្តើម កាលពីថ្ងៃចន្ទនូវសន្និបាតគណបក្សប្រជាធិបតេយ្យរយៈពេល ៤ថ្ងៃនេះ ត្រូវបានគេរំពឹងថា ក៏នឹងទាក់ទាញផងដែរនូវអ្នកតវ៉ារាប់ម៉ឺននាក់ ដែលភាគច្រើនប្រឆាំងនឹងការគាំទ្ររបស់រដ្ឋបាលលោក Biden សម្រាប់ការវាយលុកលើតំបន់ហ្កាហ្សារបស់អ៊ីស្រាអែល ដោយអ្នកតវ៉ានឹងដើរលើផ្លូវឆ្លងកាត់ទីក្រុងនៅខាងក្រៅបរិវេណសន្តិសុខ។

សម្ព័ន្ធនៃអង្គការយុត្តិធម៌សង្គមចំនួនប្រហែល ២០០ ដែលភាគច្រើនមកពីក្រុមគាំទ្រប៉ាឡេស្ទីន នឹងប្រមូលផ្តុំនៅខាងក្រៅសន្និបាតនោះ។ ប្រតិភូដែលគាំទ្រប៉ាឡេស្ទីនខ្លះ នៅសន្និបាត កំពុងជំរុញឲ្យគណបក្សផ្លាស់ប្តូរវេទិការ ដើម្បីកម្រិតការផ្ដល់អាវុធដល់អ៊ីស្រាអែល៕