រដ្ឋមន្ត្រីសុខាភិបាលកុងហ្គោ កាលពីថ្ងៃចន្ទ (១៩ សីហា) បាននិយាយថា សាធារណរដ្ឋប្រជាធិបតេយ្យកុងហ្គោ (DRC) សង្ឃឹមថា នឹងទទួលបានវ៉ាក់សាំងជំងឺអុតស្វាលើកដំបូងរបស់ខ្លួន នៅសប្តាហ៍ក្រោយ បន្ទាប់ពីមានការសន្យាពីសហរដ្ឋអាមេរិក និងជប៉ុន ដើម្បីជួយប្រយុទ្ធប្រឆាំងនឹងការរីករាលដាលរបស់វជំងឺនេះ។

អង្គការសុខភាពពិភពលោក កាលពីសប្តាហ៍មុន បានប្រកាសថា ជំអឺអុតស្វា ជាគ្រាអាសន្នសុខភាពសាធារណៈសកលជាលើកទី២ ក្នុងរយៈពេល ២ឆ្នាំ ដោយសារវីរុសបំប្លែងប្រភេទថ្មីនៃជំងឺនេះ ដែលគេស្គាល់ថា Clade Ib បានរីករាលដាលយ៉ាងឆាប់រហ័ស នៅក្នុងទ្វីបអាហ្រ្វិក។

នៅក្នុងសន្និសីទសារព័ត៌មានមួយ កាលពីថ្ងៃចន្ទ រដ្ឋមន្ត្រីក្រសួងសុខាភិបាល លោក Samuel Roger Kamba Mulamba បាននិយាយថា ប្រទេសជប៉ុន និងសហរដ្ឋអាមេរិក បានសន្យាផ្តល់វ៉ាក់សាំងដល់ប្រទេសកុងហ្គោ។

ការទៅដល់នៃវ៉ាក់សាំងនេះ នឹងជួយដោះស្រាយវិសមភាពដ៏ធំមួយ ដែលបានធ្វើឲ្យប្រទេសអាហ្រ្វិកមិនអាចទទួលបានលទ្ធភាពចាក់វ៉ាក់ចំនួន ២ដង ដែលត្រូវបានអនុវត្តនៅពេលឡើងនូវផ្ទុះជំងឺអុតស្វាជាសកល កាលពីឆ្នាំ២០២២ ខណៈពេលដែលវ៉ាក់សាំងមានលក់យ៉ាងទូលំទូលាយ នៅអឺរ៉ុប និងសហរដ្ឋអាមេរិក៕