អង្គការសប្បុរសធម៌មួយ នៅថ្ងៃអង្គារ (ទី២០ ខែសីហា) នេះ បានព្រមានថា កុមាររាប់ពាន់នាក់ នៅភាគខាងជើងប្រទេសវៀតណាម នឹងជួបការលំបាក ក្នុងការត្រឡប់ទៅសាលារៀនវិញ បន្ទាប់ពីទឹកជំនន់យ៉ាងគំហុគភ្លាមៗ និងបំនាក់ដី បានបង្កការខូចខាតដល់ផ្ទះសម្បែង បំផ្លិចបំផ្លាញដំណាំ និងកាត់ផ្តាច់សហគមន៍មួយចំនួន នៅក្នុងតំបន់។

ភាគខាងជើងនៃប្រទេសនេះ បានជួបប្រទះនូវរដូវក្តៅសើមខ្លាំង ដោយជាពិសេស តំបន់ភ្នំនៅភាគពាយព្យ រងគ្រោះយ៉ាងធ្ងន់ធ្ងរ ដោយសារភ្លៀងធ្លាក់ខ្លាំង និងទឹកជំនន់គំហុកភ្លាមៗ ចាប់តាំងពីដើមខែកក្កដាមក។

ការិយាល័យស្ថិតិទូទៅរបស់វៀតណាម កាលពីចុងខែកក្កដា បានប្រាប់ឲ្យដឹងថា ផ្ទះម្បែងជិត ២៩.០០០ខ្នង ត្រូវរងការខូចខាត ហើយដំណាំលើផ្ទៃដី ៩០.០០០ហិកតា ត្រូវបានបំផ្លិចបំផ្លាញ។

នៅក្នុងខេត្ត Son La មនុស្សប្រហែល ១,៣លាននាក់បានរងផលប៉ះពាល់។ នេះបើយោងតាមអង្គការ Save the Children ដែលបានប្រាប់ថា ទឹកជំនន់បានធ្វើឲ្យជនបទរញ៉ែរញ៉ៃដោយកម្ទេចកម្ទី ដោយស្ពានត្រូវបាក់ និងផ្លូវថ្នល់រងការខូចខាតយ៉ាងធ្ងន់ធ្ងរ។

បើយោងតាមមន្ត្រីគ្រោះមហន្តរាយរបស់ប្រទេសវៀតណាម បានឲ្យដឹងថា មនុស្ស ១១នាក់ បានបាត់បង់ជីវិត នៅក្នុងតំបន់នេះ ហើយផ្ទះប្រមាណ ២.៦៧០ខ្នង និងអគារសិក្សាចំនួន ២៩ រងការខូចខាត។

អង្គការ Save the Children បានបន្ថែមថា កុមារចំនួន ៤.៥០០នាក់ នឹងជួបប្រទះនូវ «បញ្ហាប្រឈមសុវត្ថិភាព» នៅពេលដែលពួកគេព្យាយាមវិលត្រឡប់ទៅសាលារៀនវិញ នៅដើមខែកញ្ញានេះ៕