ព្រឹទ្ធសមាជិកក្នុងប្រទេសថៃ នៅថ្ងៃអង្គារ (ទី២០ ខែសីហា) នេះ បានស្នើសុំជាផ្លូវការឲ្យមានការស៊ើបអង្កេតរបស់សភា លើអ្នកនយោបាយជើងចាស់ និងជាអតីតមេទ័ពម្នាក់ដែលបានវាយអ្នកសារព័ត៌មានរបស់ស្ថានីយទូរទស្សន៍ ត្រូវចំក្បាល បន្ទាប់ពីរូបនាងបានសួរសំណួរទៅគាត់។

លោក Prawit Wongsuwon វ័យ ៧៩ឆ្នាំ សមាជិកសភា និងជាអតីតឧបនាយករដ្ឋមន្ត្រី ដែលជាប់ពាក់ព័ន្ធនៅក្នុងរដ្ឋប្រហារ ២លើកចុងក្រោយ នៅប្រទេសថៃ បានវាយអ្នកសារព័ត៌មានជាស្ត្រីម្នាក់ កាលពីថ្ងៃសុក្រ ខណៈពេលរូបលោកកំពុងឡោមព័ទ្ធដោយអ្នកសារព័ត៌មាន ដោយរូបភាពវីដេអូវីដេអូត្រូវបានផ្សព្វផ្សាយយ៉ាងព្រោងព្រាត។

អ្នកដោះស្រាយទំនាស់នយោបាយដ៏ល្បីល្បាញ និងជាឥស្សរជនឈរនៅកណ្តាល ក្នុងជម្លោះនយោបាយរយៈពេល ២ទសវត្សរ៍របស់ប្រទេសថៃ លោក Prawit ដែលដឹកនាំគណបក្ស Palang Pracharat បានបម្រើការនៅក្នុងរបបយោធាចុងក្រោយ និងជាឧបនាយករដ្ឋមន្ត្រីអស់រយៈពេល ៩ឆ្នាំ បន្ទាប់ពីមានរដ្ឋប្រហារឆ្នាំ២០១៤។

ដោយបានប្រាប់សារព័ត៌មាន Reuters ថា លោកបានស្នើសុំឲ្យមានការស៊ើបអង្កេតលើក្រមសីលធម៌ ចំពោះលោក Prawit សមាជិកព្រឹទ្ធសភា លោក Tewarait Maneechai បាននិយាយថា៖ «អាកប្បកិរិយានេះ គឺជាការយាយីដល់រាងកាយ»។ លោកបានបន្ថែមថា៖ «ទង្វើនេះក៏ជាការមិនគោរពផងដែរ ចំពោះអ្នកសារព័ត៌មានដែលកំពុងបំពេញការងាររបស់ខ្លួន»។

ពាក់ព័ន្ធនឹងករណីនេះ អ្នកនាំពាក្យគណបក្ស Palang Pracharat លោក Piya Tavichai បាននិយាយថា លោក Prawit ស្គាល់អ្នកសារព័ត៌មាននោះច្បាស់ ហើយបានសុំទោស ដោយបន្ថែមថា លោកអាចបញ្ជាក់ការពិត នៅក្នុងដំណើរការសភាណាមួយ។

លោក Piya បាននិយាយថា៖ «គាត់កំពុងនិយាយលេងសើចជាមួយនាង (អ្នកសារព័ត៌មាន) ដោយសារជាមនុស្សម្នាក់ដែលគាត់ស្និទ្ធស្នាលជាមួយ។ ដោយសារគាត់ជាទាហាន ការលេងសើចអាចមើលទៅហាក់ដូចជាហិង្សាបន្តិច ប៉ុន្តែអ្នកដែលជិតស្និទ្ធនឹងគាត់ ដឹងច្បាស់ថា គាត់លេងបែបនេះគ្រប់ពេល»។

លោក Prawit និងអ្នកសារព័ត៌មានដែលធ្វើការឲ្យទូរទស្សន៍ ThaiPBS មិនអាចទាក់ទងសុំការអធិប្បាយបានឡើយ។ ឧបទ្ទវហេតុនេះបានបង្កឲ្យមានការថ្កោលទោសយ៉ាងទូលំទូលាយពីសហគមន៍ប្រព័ន្ធផ្សព្វផ្សាយរបស់ថៃ។ ទូរទស្សន៍ ThaiPBS បានស្នើឲ្យលោក Prawit ទទួលខុសត្រូវចំពោះសកម្មភាពរបស់លោក៕