មន្ត្រីឧស្សាហកម្ម បាននិយាយកាលពីថ្ងៃអង្គារថា អាជ្ញាធរប្រទេសអាហ្សង់ទីន បានដាក់នាវាដឹកទំនិញមួយគ្រឿងឱ្យនៅចតដាច់ពីគេនៅលើទន្លេ Parana ក្បែរកំពង់ផែគ្រាប់ធញ្ញជាតិក្នុងស្រុក Rosario ជុំវិញករណីសង្ស័យថា មានអ្នកផ្ទុកជំងឺអុតស្វា នៅលើនាវា។

លោក Fernando Morales ប្រធានស្ថាប័នឧស្សាហកម្មនៃសម្ព័ន្ធកងទ័ពជើងទឹកអាហ្សង់ទីន បាននិយាយថា នាវាដោតទង់ជាតិប្រទេសលីបេរីយ៉ា ដែលត្រូវបានកំណត់ដើម្បីឲ្យមកដឹកទំនិញសណ្តែកសៀង ត្រូវបានបញ្ជាឱ្យបោះយុថ្កានៅលើទន្លេ ខណៈធ្វើតេស្តលើសមាជិកនាវិក ត្រូវបានអនុវត្ត។

លោក Morales និយាយថា សមាជិកនាវិកម្នាក់មានអការៈគ្រុនក្តៅ និងចុះខ្សោយ ត្រូវបានបញ្ជូនទៅមន្ទីរពេទ្យ។ នៅទីនោះ ពួកគេបានធ្វើតេស្តមួយចំនួន ហើយពួកគេនិយាយថា ក្នុងស្ថានភាពនេះ វាអាចជាជំងឺអុតស្វា ប៉ុន្តែរោគវិនិច្ឆ័យពុំទាន់ត្រូវបានបញ្ជាក់នៅឡើយ។

អង្គការសុខភាពពិភពលោក កាលពីសប្តាហ៍មុនបានប្រកាសថាជំងឺអុតស្វា ជាគ្រាអាសន្នសុខភាពសាធារណៈសកល ជាលើកទីពីរក្នុងរយៈពេល២ឆ្នាំមកនេះ ខណៈប្រភេទវីរុសបំប្លែងខ្លួនថ្មីនេះ រាលដាលយ៉ាងឆាប់រហ័សនៅក្នុងទ្វីបអាហ្រ្វិក។ មួយថ្ងៃក្រោយមក ករណីវីរុសបំប្លែងខ្លួន clade 1b ត្រូវបានបញ្ជាក់នៅក្នុងប្រទេសស៊ុយអែត ជាសញ្ញាដំបូងនៃការរាលដាលវីរុសនេះ នៅខាងក្រៅទ្វីបអាហ្រ្វិក។

ជំងឺអុតស្វា ជាវីរុសឆ្លងដែលបណ្តាលឱ្យមានដំបៅខ្ទុះ និងរោគសញ្ញាដូចជំងឺផ្តាសាយ ជាធម្មតាមានស្ថានភាពស្រាល ប៉ុន្តែអាចបណ្តាលឲ្យស្លាប់បាន។ វីរុសបំប្លែងខ្លួនថ្មី clade 1b បានបង្កឱ្យមានការព្រួយបារម្ភ ព្រោះវាហាក់ដូចជារាលដាលកាន់តែងាយស្រួលតាមរយៈទំនាក់ទំនងជិតស្និទ្ធជាប្រចាំ។ លោក Morales និយាយថា អាជ្ញាធរសុខាភិបាលកំពុងយាមនាវា ហើយនឹងពិនិត្យសមាជិកនាវិក ដទៃទៀត។

យោងតាមទិន្នន័យរបស់អង្គការសុខភាពពិភពលោកគិតត្រឹមសប្តាហ៍មុន បានឲ្យដឹងថា ប្រទេសចំនួន១៣ បានរាយការណ៍ករណីជំងឺអុតស្វា បង្កឡើងដោយវីរុសបំប្លែងខ្លួនផ្សេងៗនៅទូទាំងទ្វីបអាមេរិក ក្នុងឆ្នាំនេះ។ ប្រទេសអាហ្សង់ទីន កាលពីពេលមុន បានកត់ត្រាករណីជំងឺនេះចំនួន ៨ករណី ។