ចៅក្រមតំបន់ និងចៅក្រមពហុតំបន់ជាង ១.០០០នាក់ នៅក្នុងប្រទេសម៉ិកស៊ិក បានបោះឆ្នោតដើម្បីចូលរួមធ្វើកូដកម្មនៅទូទាំងប្រទេសគ្មានកំណត់ពេល ដែលបានចាប់ផ្តើមតាំងពីថ្ងៃច័ន្ទ ទី១៩ សីហា ក្នុងពេលមានការតវ៉ាកាន់តែខ្លាំងឡើងប្រឆាំងផែនការរបស់គណបក្សកាន់អំណាចដើម្បីផ្លាស់ប្តូរប្រព័ន្ធតុលាការរបស់ប្រទេស។

សមាគមជាតិនៃអង្គចៅក្រមពហុតំបន់ និងចៅក្រមប្រចាំតំបន់ ដែលតំណាងឱ្យចៅក្រមតំបន់ និងពហុតំបន់ ប្រហែល ១.៤០០នាក់ បាននិយាយថា សមាជិករបស់ខ្លួននឹងចូលរួមធ្វើកូដកម្មនៅថ្ងៃពុធ ទី២១ សីហា នេះ បន្ទាប់ពីការបោះឆ្នោតភ្លូកទឹកភ្លូកដី កាលពីថ្ងៃចន្ទ សម្រាប់ការតវ៉ា។

កំណែទម្រង់ប្រព័ន្ធតុលាការ ដែលចៅក្រម រួមទាំងចៅក្រមតុលាការកំពូល នឹងត្រូវបានជ្រើសរើសដោយការបោះឆ្នោតគាំទ្រ គឺជាអាទិភាពកំពូលរបស់ប្រធានាធិបតី លោក Andres Manuel Lopez Obrador ដែលជិតផុតអាណត្តិ។ ទោះជាយ៉ាងណា ទីផ្សារត្រូវបានធ្វើឲ្យភ្ញាក់ផ្អើលដោយសារសំណើនេះ ក្នុងពេលមានការព្រួយបារម្ភថា ការផ្លាស់ប្តូរប្រព័ន្ធតុលាការ អាចធ្វើឲ្យបាត់បង់តុល្យភាពអំណាច ជុំវិញអំណាចប្រធានាធិបតី និងនាំទៅដល់ការដណ្តើមនយោបាយរបស់តុលាការ។

កាលពីថ្ងៃអង្គារ លោក Lopez Obrador បានចាត់ទុកកូដកម្មនេះថាខុសច្បាប់ ហើយបានលើកឡើងថា ចៅក្រមប្រព្រឹត្តអំពើពុករលួយ ខណៈលោកថ្លែងក្នុងសន្និសីទសារព័ត៌មានប្រចាំថ្ងៃ។

សហជីពដែលបានធ្វើកូដកម្ម កាលពីថ្ងៃចន្ទ តំណាងឲ្យបុគ្គលិកតុលាការចំនួន ៥៥.០០០នាក់របស់ប្រទេសម៉ិកស៊ិក។ ពួកគេនិយាយថាកំណែទម្រង់ នឹងបញ្ចប់ផ្លូវអាជីពដែលផ្អែកលើគុណសម្បត្តិ។

កំណែទម្រង់នេះ នឹងត្រូវបានបោះឆ្នោតដោយសមាជិកសភា មកពីសភាដែលទើបជាប់ឆ្នោតថ្មីនៅខែក្រោយ ជាអំឡុងពេលនៅខែចុងក្រោយរបស់មេដឹកនាំឆ្វេងនិយម ដែលនឹងចូលកាន់តំណែង។