រដ្ឋមន្ត្រីការបរទេសអាមេរិក លោក អង់តូនី ប្លីងខិន (Antony Blinken) ក្នុងអំឡុងដំណើរទស្សនកិច្ចដ៏លំបាកទៅកាន់មជ្ឈិមបូព៌ា បានស្វះស្វែងជំរុញបន្ថែមនូវភាពបន្ទាន់ទៅក្នុងកិច្ចប្រឹងប្រែងដើម្បីសម្របសម្រួលបទឈប់បាញ់មួយនៅតំបន់ហ្កាហ្សា ប៉ុន្តែលោកបានចាកចេញពីតំបន់កាលពីថ្ងៃអង្គារ (២០ សីហា) ជាមួយនឹងភាពស្រពិចស្រពិលក្នុងកិច្ចព្រមព្រៀងរវាងអ៊ីស្រាអែល និងក្រុមហាម៉ាស ដែលនៅតែមិនទាន់សម្រេចបាននៅឡើយ។

លោក Blinken និងអ្នកសម្រុះសម្រួលមកពីប្រទេសអេហ្ស៊ីប និងកាតា បានដាក់ក្តីសង្ឃឹមរបស់ពួកគេលើ «សំណើបំពេញចន្លោះប្រហោង» របស់សហរដ្ឋអាមេរិក ក្នុងបំណងកាត់បន្ថយគម្លាតរវាងភាគីទាំងពីរនៅក្នុងសង្រ្គាមរយៈពេល ១០ខែ បន្ទាប់ពីកិច្ចចរចាកាលពីសប្តាហ៍មុនបានផ្អាកដោយគ្មានដំណោះស្រាយ។

លោក Blinken បានប្រាប់អ្នកយកព័ត៌មាននៅទីក្រុង ដូហា (Doha) មុនពេលចាកចេញទៅទីក្រុងវ៉ាស៊ីនតោន វិញថា៖ កិច្ចព្រមព្រៀងនេះ «ចាំបាច់ត្រូវតែមាន ហើយវាត្រូវតែសម្រេចបាននៅប៉ុន្មានថ្ងៃខាងមុខ។ យើងនឹងធ្វើគ្រប់យ៉ាងដែលអាចធ្វើបានដើម្បីបញ្ចប់រឿងនេះ»។

មន្ត្រីជាន់ខ្ពស់របស់រដ្ឋបាលអាមេរិក ដែលធ្វើដំណើរជាមួយលោក Blinken បាននិយាយថា អាមេរិករំពឹងថាកិច្ចចរចាបទឈប់បាញ់នឹងបន្តនៅសប្តាហ៍នេះ។

បន្ទាប់ពីជួបជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) កាលពីថ្ងៃចន្ទ លោក Blinken បាននិយាយថា អ៊ីស្រាអែលបានទទួលយកសំណើនេះ ហើយបានជំរុញឱ្យក្រុមហាម៉ាស ធ្វើដូចគ្នានេះ។ ក្រុមប៉ាឡេស្ទីនមួយនេះមិនបានច្រានចោលយ៉ាងច្បាស់ទេ ប៉ុន្តែនិយាយថាខ្លួនបដិសេធលក្ខខណ្ឌដែលបានព្រមព្រៀងពីមុន៕