តម្រូវការថាមពលក្នុងរដ្ឋ តិចសាស់ (Texas) របស់សហរដ្ឋអាមេរិក បានកើនឡើងខ្ពស់ខ្លាំងបំផុតក្នុងកំណត់ត្រាកាលពីថ្ងៃអង្គារ (២០ សីហា) ខណៈដែលលំនៅឋាន និងអាជីវកម្មនានាបានបង្កើនការប្រើប្រាស់ម៉ាស៊ីនត្រជាក់ដើម្បីគេចពីរលកកម្ដៅដ៏ខ្លាំងក្លានៅទូទាំងរដ្ឋ។

កំណើននៃចំនួនប្រជាជននៅរដ្ឋតិចសាស់ ក្នុងប៉ុន្មានឆ្នាំថ្មីៗនេះ និងតួនាទីរបស់រដ្ឋជាមជ្ឈមណ្ឌលសម្រាប់ឧស្សាហកម្មដែលពឹងផ្អែកលើថាមពលច្រើនបំផុត រួមទាំងជាមជ្ឈមណ្ឌលសម្រាប់ទិន្នន័យ និងការសន្សំកាក់គ្រីបតូ (Cryptocurrency Mining) បានបង្កើនតម្រូវការថាមពលយ៉ាងខ្លាំង និងជំរុញភាពតានតឹងលើបណ្តាញផ្គត់ផ្គង់អគ្គិសនីដែលងាយរងគ្រោះរបស់រដ្ឋ។

បន្ទាប់ពីបំបែកកំណត់ត្រានៃតម្រូវការខ្ពស់បំផុតជាច្រើនដងក្នុងខែមេសា និងឧសភា តម្រូវការថាមពលខ្ពស់បំផុតនៃរដ្ឋតិចសាស់ បានឈានដល់កម្រិតបឋមជាង ៨៥.៥០០ មេហ្គាវ៉ាត់ (MW) កាលពីថ្ងៃអង្គារ ដែលខ្ពស់ជាងកំណត់ត្រាពីមុនក្នុងខែសីហា ឆ្នាំ២០២៣ នេះបើយោងតាមក្រុមប្រឹក្សាភាពជឿជាក់នៃអគ្គិសនីរដ្ឋតិចសាស់។

ក្រុមប្រឹក្សា ដែលប្រតិបត្តិការភាគច្រើនលើបណ្តាញអគ្គិសនីសម្រាប់អតិថិជន ២៧លាននាក់នេះនិយាយថា ខ្លួនរំពឹងថាតម្រូវការនឹងបន្ធូរបន្ថយបន្តិចនៅថ្ងៃពុធ (២១ សីហា) នេះ ហើយបណ្តាញថាមពលកំពុងដំណើរការជាធម្មតាដោយមានការផ្គត់ផ្គង់គ្រប់គ្រាន់សម្រាប់បំពេញតម្រូវការដែលរំពឹងទុក។

ថាមពល ១មេហ្គាវ៉ាត់អាចផ្គត់ផ្គង់ដល់លំនៅឋាន ៨០០ខ្នងនៅថ្ងៃធម្មតា ប៉ុន្តែអាចបានត្រឹមតែ ២៥០ខ្នងប៉ុណ្ណោះនៅថ្ងៃរដូវក្តៅក្នុងរដ្ឋតិចសាស់ នៅពេលដែលមនុស្សម្នាសម្រុកបើកម៉ាស៊ីនត្រជាក់៕