ប្រជាជនទីក្រុង Porto Velho ក្នុងតំបន់ Amazon ប្រទេសប្រេស៊ីល ទើបតែបានឃើញពន្លឺថ្ងៃ ក្នុងរយៈពេលប៉ុន្មានថ្ងៃមកនេះ ដោយសារតែពពកផ្សែងដ៏ក្រាស់មកពីចំហេះព្រៃដែលបានហ៊ុមព័ទ្ធទីក្រុងរបស់ពួកគេ។

គ្រូបង្រៀន អាយុ៣០ឆ្នាំម្នាក់ក្នុងចំណោមប្រជាជនប្រហែល ៤៦០.០០០នាក់ ដែលរស់នៅក្នុងទីក្រុងជិតព្រំដែនជាមួយប្រទេសបូលីវី បាននិយាយថា «យើងកំពុងខំប្រឹងដើម្បីដកដង្ហើម»។

កាលពីថ្ងៃអង្គារ ទី២០ សីហា កំហាប់នៃភាគល្អិតតូចៗបង្កមជំងឺហារីក ដែលគេស្គាល់ថាភាគល្អិត PM2.5 បានឈានដល់ ៥៦,៥ មីក្រូក្រាមក្នុងមួយម៉ែត្រគូបនៃខ្យល់ នៅក្នុងទីក្រុង Porto Velho ដែលមាន១១ដងច្រើនជាងការកំណត់ដែលបានណែនាំដោយអង្គការសុខភាពពិភពលោក។

ការស្រូបយកភាគល្អិត PM2.5 ត្រូវបានគេរកឃើញថា អាចបង្កើនហានិភ័យជំងឺមហារីកសួត ជំងឺបេះដូង ជំងឺដាច់សរសៃឈាមខួរក្បាល ជំងឺទឹកនោមផ្អែម និងបញ្ហាសុខភាពជាច្រើនទៀត។

អ្នកចូលនិវត្តន៍អាយុ៦២ ឆ្នាំ លោក Carlos Fernandes បាននិយាយទៅកាន់សារព័ត៌មាន AFP ថា វាពិបាកដើម្បីគេចចេញពីផ្សែង ទោះបីនៅផ្ទះក៏ដោយ។ វាជារឿងដ៏គួរឱ្យព្រួយបារម្ភ កាលពីម្សិលមិញលោកភ្ញាក់ពីដំណេកពាក់កណ្តាលអធ្រាត្រ ហើយភ្នែករបស់លោកបានឈឺ ដោយសារតែផ្សែង ចូលមកក្នុងលំនៅឋានរបស់លោក ។

រដ្ឋាភិបាលនៃរដ្ឋ Rondonia ជឿថាការដុតព្រៃខុសច្បាប់ ដែលជារឿយៗចាប់ផ្តើមដោយកសិករ ឈូសឆាយដី គឺជាមូលហេតុមួយនៃគ្រោះមហន្តរាយចំហះព្រៃ ហើយបានចាប់ផ្តើមយុទ្ធនាការតាមបណ្តាញអ៊ីនធឺណិត ដោយអំពាវនាវឱ្យប្រជាជន រាយការណ៍ទៅពួកគេ។