អ្នកនាំពាក្យក្រសួងពាណិជ្ជកម្មចិន បាននិយាយកាលពីថ្ងៃអង្គារ (២០ សីហា) ថា ប្រទេសចិន ប្រឆាំងនឹងផែនការរបស់គណៈកម្មការអឺរ៉ុបក្នុងការដាក់ពន្ធនាំចូលរហូតដល់ ៣៦,៣ភាគរយ លើរថយន្តអគ្គិសនីរបស់ចិន (EVs) ហើយនឹងចាត់វិធានការចាំបាច់ទាំងអស់ដើម្បីការពារសិទ្ធិ និងផលប្រយោជន៍ស្របច្បាប់របស់សហគ្រាសចិន។

កាលពីខែមុន គណៈកម្មការអឺរ៉ុបបានដាក់ពន្ធបន្ថែមបណ្តោះអាសន្នរហូតដល់ ៣៧,៦ភាគរយលើក្រុមហ៊ុនផលិតរថយន្តអគ្គិសនីចិន បន្ទាប់ពីខ្លួនបានចាប់ផ្តើមការស៊ើបអង្កេតប្រឆាំងនឹងការឧបត្ថម្ភធនលើរថយន្តអគ្គិសនីរបស់ចិន ក្នុងខែតុលា ឆ្នាំ២០២៣។ កាលពីថ្ងៃអង្គារ គណៈកម្មការនេះបានចេញផ្សាយសេចក្តីព្រាងផែនការដើម្បីធ្វើឱ្យពន្ធគយទាំងនោះមានភាពច្បាស់លាស់នៅអត្រាការកែប្រែបន្តិចបន្តួច ជាកម្មវត្ថុនៃការយល់ព្រមពីបណ្ដារដ្ឋសមាជិកសហភាពអឺរ៉ុប។

តាមអ្នកនាំពាក្យក្រសួងពាណិជ្ជកម្មរូបនោះលើកឡើងថា ដំណើរការស៊ើបអង្កេតប្រឆាំងការឧបត្ថម្ភធនរបស់គណៈកម្មការអឺរ៉ុបលើរថយន្ត EV របស់ចិន មិនគោរពតាមច្បាប់របស់អង្គការពាណិជ្ជកម្មពិភពលោកទេ និងជាសកម្មភាព «ប្រកួតប្រជែងមិនស្មើភាព» ក្រោមរូបភាពនៃ «ការប្រជែងដោយយុត្តិធម៌» ដែលអឺរ៉ុបបានអះអាង។

អ្នកនាំពាក្យបន្តថា ការអនុវត្តដ៏ខុសឆ្គងរបស់គណៈកម្មការអឺរ៉ុបនឹងរំខានដល់ស្ថិរភាពនៃខ្សែសង្វាក់ផ្គត់ផ្គង់រថយន្តពិភពលោក និងប៉ះពាល់ដល់ផលប្រយោជន៍អ្នកប្រើប្រាស់អឺរ៉ុប ដោយបន្ថែមថានេះក៏នឹងធ្វើឱ្យខូចដល់ការផ្លាស់ប្តូរទៅរកភាពបៃតងរបស់សហភាពអឺរ៉ុប និងកិច្ចសហប្រតិបត្តិការជាសកលក្នុងការដោះស្រាយបម្រែបម្រួលអាកាសធាតុផងដែរ៕