នាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃអង្គារ (ទី២០ ខែសីហា) បានប្រាប់ក្រុមគ្រួសារចំណាប់ថ្នូរថា កិច្ចព្រមព្រៀងបទឈប់បាញ់ អាចនឹងមិនសម្រេចបាននោះទេ ហើយថា យោធាអ៊ីស្រាអែល នឹងមិនបោះបង់ចោលនោះទេនូវការគ្រប់គ្រងលើព្រំដែនតំបន់ហ្កាហ្សា-អេហ្ស៊ីប ដែលជាតម្រូវការដ៏សំខាន់របស់ក្រុមសកម្មប្រយុទ្ធហាម៉ាស។

ក្រុម Hostages Families Forum (វេទិកាគ្រួសារចំណាប់ថ្នូរ) បានដកស្រង់សម្តីរបស់លោក Netanyahu ដែលនិយាយថា អ៊ីស្រាអែល «ទោះស្ថិតក្នុងក្រោមកាលៈទេសៈណាក៏ដោយ នឹងមិនចាកចេញពីអ័ក្ស Philadelphia និងច្រករបៀង Netzer» ជាដាច់ខាត ហើយប្រាប់ថា លោក «មិនប្រាកដ» ថា កិច្ចព្រមព្រៀងមួយ អាចនឹងត្រូវបានឈានដល់ដែរ ឬយ៉ាងណានោះទេ។ ក្រុមនេះបានចោទប្រកាន់លោក Netanyahu ថា បានបដិសេធរាល់កិច្ចព្រមព្រៀងចំណាប់ថ្នូរទាំងអស់។

តាមរយៈការបង្ហោះតាមបណ្ដាញសង្គមក្រុមនេះ បានឲ្យដឹងថា៖ «គ្មានក្ដីសង្ឃឹម និងគ្មានវីរភាព ក្នុងជំហររឹងមាំដែលនឹងនាំឲ្យមានការស្លាប់បន្តទៀតនៃអ្នកដែលត្រូវចាប់ពង្រត់ទាំងអស់នោះទេ។ រដ្ឋាភិបាលអ៊ីស្រាអែលបានបោះបង់ចោលអ្នកដែលត្រូវបានចាប់ជាចំណាប់ថ្នូរ នៅថ្ងៃទី៧ ខែតុលា ហើយឥឡូវនេះកំពុងបោះបង់ចោលពួកគេរៀងរហូត»។

គួរបញ្ជាក់ថា រដ្ឋបាលរបស់លោក Joe Biden បាន និងកំពុងជំរុញដល់សំណើរួមបញ្ចូលគ្រប់យ៉ាង ចំពេលមានក្តីសង្ឃឹមថា កិច្ចព្រមព្រៀងមួយអាចនឹងត្រូវសម្រេចបាន នៅចុងសប្តាហ៍នេះ។ បន្ទាប់ពីលោក Netanyahu បានប្រកាសកាលពីថ្ងៃចន្ទថា អ៊ីស្រាអែលអាចទទួលយកផែនការនេះជាគោលការណ៍ ក្រុមហាម៉ាស បានចេញសេចក្តីថ្លែងការណ៍មួយដោយច្រានចោលផែនការនេះថា លើសពីបញ្ជីនៃការទាមទាររបស់អ៊ីស្រាអែលបន្តិច។ ប៉ុន្មានម៉ោងក្រោយមក ប្រធានាធិបតីអាមេរិក លោក Biden បានចោទប្រកាន់ក្រុមហាម៉ាសថា «មិនគាំទ្រ» កិច្ចព្រមព្រៀង៕