Golkar ដែលជាគណបក្សនយោបាយធំទី២ របស់ប្រទេសឥណ្ឌូនេស៊ី ត្រូវបានគេរំពឹងថា នឹងធ្វើពិធីតែងតាំងសម្ព័ន្ធមិត្តដ៏សំខាន់របស់ប្រធានាធិបតីលោក Joko Widodo (Jokowi) ជាប្រធានថ្មី នៅថ្ងៃពុធ (ទី២១ ខែសីហា) នេះ ជាការសម្រេចដែលសមាជិកគណបក្សនិយាយថា អាចធ្វើឲ្យប្រធានាធិបតីដែលជិតផុតអាណត្តិ អាចរក្សាឥទ្ធិពលរបស់ខ្លួន បន្ទាប់ពីលោកបានចុះចេញពីតំណែង ក្នុងខែតុលា។

សមាជិករបស់គណបក្សរ Golkar ២នាក់ បានប្រាប់សារព័ត៌មាន Reuters ថា លោក Bahlil Lahadalia ជារដ្ឋមន្ត្រីថាមពលដែលទើបតែងតាំងថ្មី និងជាដៃស្តាំរបស់លោកប្រធានាធិបតី ត្រៀមជាស្រេចហើយ ក្នុងការត្រូវបានបញ្ជាក់ថា ជាប្រធានគណបក្ស ក្នុងយុគសម័យរបស់លោក Suharto បន្ទាប់ពីរូបលោកត្រូវបានអនុម័តជាបេក្ខជនតែម្នាក់ឯង។

សមាជិកជាន់ខ្ពស់របស់គណបក្ស គឺលោក Ace Hasan Syadzily បាននិយាយថា៖ «ប្រធានតមាតំបន់ទាំងអស់ បានប្រកាសពីការគាំទ្ររបស់ពួកគេ ចំពោះលោក Bahlil។ នៅរសៀលនេះ យើងនឹងប្រកាសជាផ្លូវការថា លោកជាប្រធានថ្មី»។

ដើមឡើយ គណបក្ស Golkar គ្រោងនឹងរៀបចំសមាជប្រចាំឆ្នាំរបស់ខ្លួន នៅក្នុងខែធ្នូ ប៉ុន្តែការលាលែងដ៏គួរឲ្យភ្ញាក់ផ្អើលរបស់លោក Airlangga Hartarto ពីតំណែងប្រធាននេះ កាលពីចុងសប្តាហ៍មុន បានឃើញព្រឹត្តិការណ៍នេះត្រូវបានធ្វើលឿនជាងកាលកំណត់។ កិច្ចប្រជុំរយៈពេល ២ថ្ងៃ នឹងបញ្ចប់នៅថ្ងៃទី២១ ខែសីហានេះ៕