ប្រទេសឥណ្ឌា និងជប៉ុន បានព្រមព្រៀងគ្នា កាលពីថ្ងៃអង្គារ (ទី២០ ខែសីហា) ដើម្បីពង្រឹងទំនាក់ទំនងការពារជាតិ និងសន្តិសុខ ហើយនិងគាំទ្រ «ចក្ខុវិស័យយុទ្ធសាស្ត្ររួម» នៃឥណ្ឌូប៉ាស៊ីហ្វិកសេរី និងបើកចំហ ជាតំបន់ដែលប្រទេសទាំង២ មានបញ្ហាទំនាក់ទំនងជាមួយប្រទេសចិន។

រដ្ឋមន្ត្រីការបរទេស និងការពារជាតិនៃប្រទេសទាំង២ បានជួបពិភាក្សាគ្នាក្រោមប្រធានបទអ្វីដែលគេហៅថា កិច្ចសន្ទនា «ឥណ្ឌា-ជប៉ុន 2+2» នៅទីក្រុងញូវដេលី ប្រទេសឥណ្ឌា ដែលជាទំនាក់ទំនងទ្វេភាគីទី៣ ក្នុងរយៈពេល ៥ឆ្នាំ។ 

បើយោងតាមសេចក្តីថ្លែងការណ៍រួម បានឲ្យដឹងថា រដ្ឋមន្ត្រីនៃប្រទេសទាំង២ បានពិភាក្សាអំពីវឌ្ឍនភាពលើការផ្ទេរអង់តែនទំនាក់ទំនងនាវាចម្បាំង និងបច្ចេកវិទ្យាពាក់ព័ន្ធ ពីជប៉ុនទៅកាន់ឥណ្ឌា។

គួរបញ្ជាក់ថា កិច្ចចប្រឹងប្រែងនេះ នឹងកត់សម្គាល់នូវការនាំចេញឧបករណ៍ការពារជាតិលើកដំបូង និងការផ្ទេរបច្ចេកវិទ្យាទៅកាន់ទីក្រុងញូវដេលី ក្រោមកិច្ចព្រមព្រៀងឆ្នាំ២០១៥ ខណៈដែលទីក្រុងតូក្យូស្វែងរកការពង្រឹងឧស្សាហកម្មការពារជាតិរបស់ខ្លួន៕