ប្រធានាធិបតីកូរ៉េខាងត្បូង លោក យូន សុក យ៉ូល (Yoon Suk Yeol) បានព្រមាននៅថ្ងៃពុធនេះថា ប្រទេសកូរ៉េខាងជើង នឹងប្រឈមមុខនឹងការបញ្ចប់នៃរបបរបស់ខ្លួន ប្រសិនបើខ្លួន ព្យាយាមឈ្លានពានកូរ៉េខាងត្បូង ខណៈពេលដែលលោក កំពុងត្រួតពិនិត្យសមយុទ្ធប្រចាំឆ្នាំជាមួយសហរដ្ឋអាមេរិក។

លោក យូន បានធ្វើការអត្ថាធិប្បាយក្នុងអំឡុងពេលដំណើរទស្សនកិច្ចរបស់លោក ទៅកាន់ទីបញ្ជាការប្រតិបត្តិការជើងគោកនៅក្នុងទីក្រុង Yongin ភាគខាងត្បូងនៃទីក្រុងសេអ៊ូល ជាកន្លែងដែលលោកបានទទួលព័ត៌មានសង្ខេបអំពីសមយុទ្ធ Ulchi Freedom Shield ។ សមយុទ្ធយោធារួមនេះ បានចាប់ផ្តើមកាលពីថ្ងៃចន្ទសម្រាប់រយៈពេល ១១ថ្ងៃ។

លោក យូន បាននិយាយថា៖«របបកូរ៉េខាងជើង គឺជាក្រុមដែលខ្វះការពិចារណាបំផុតនៅលើផែនដី ដែលអាចបង្កការបង្កហេតុបានគ្រប់ពេលវេលា»។ «មានតែការត្រៀមលក្ខណៈយោធាដ៏រឹងមាំរបស់យោធារបស់យើងប៉ុណ្ណោះ ដែលអាចរារាំងពួកគេមិនឲ្យធ្វើការប៉ានស្មានខុស»។

លោកប្រធានាធិបតីខាងត្បូងរូបនេះ បានគូសបញ្ជាក់អំពីសារៈសំខាន់នៃសមយុទ្ធរួមក្នុងការវាយតម្លៃការត្រៀមខ្លួនខាងយោធា និងពង្រឹងជំហរការពាររួមគ្នារបស់សម្ព័ន្ធមិត្តប្រឆាំងនឹងការគំរាមកំហែងផ្នែកយោធារបស់កូរ៉េខាងជើងដែលកំពុងកើនឡើង។