វៀតណាម៖ រដ្ឋាភិបាលបាននិយាយថា ប្រទេសវៀតណាមកំពុងពន្លឿនកម្មវិធីចាក់វ៉ាក់សាំងរបស់ខ្លួន ខណៈដែលប្រទេសព្យាយាមបន្ធូរបន្ថយវិធានការរឹតត្បិត ការរាំងខ្ទប់ដោយសារវីរុសឆ្លង COVID-19 នៅក្នុងទីក្រុងធំៗនៅចុងខែកញ្ញានេះ។ នៅរដ្ឋធានីហាណូយដែលស្ថិតក្រោមបទបញ្ជាបិទខ្ទប់ប្រទេសចាប់តាំងពីខែកក្កដា បុគ្គលិកសុខាភិបាលកំពុងធ្វើការរហូតដល់យប់ ដើម្បីផ្តល់វ៉ាក់សាំងការពារជំងឺកូវីដ-១៩។
យោងតាមក្រសួងសុខាភិបាលបានឲ្យដឹងថា ទីក្រុងនេះបានផ្តល់វ៉ាក់សាំងចំនួន ៥.៥លានដូសចាប់តាំងពីខែមីនា នៅពេលដែលប្រទេសវៀតណាមចាប់ផ្តើមកម្មវិធីចាក់វ៉ាក់សាំង។ អត្រានៃការចាក់វ៉ាក់សាំងបង្ការវីរុសរួមទាំងអស់ របស់ប្រទេសវៀតណាមនៅតែមានកម្រិតទាបគឺមានត្រឹមតែ ២៨% ប៉ុណ្ណោះក្នុងចំណោមប្រជាជន ៩៨លាននាក់ ហើយមានតែចំនួន ៤% បានចាក់វ៉ាក់សាំងពេញលេញចំនួនពីរដូស។ កង្វះខាតការផ្គត់ផ្គង់បានធ្វើឱ្យប្រទេសវៀតណាម ពន្យារពេលកម្មវិធីចាក់វ៉ាក់សាំងរបស់ខ្លួនក្នុងរយៈពេលប៉ុន្មានខែចុងក្រោយនេះ ខណៈវីរុសបំប្លែងខ្លួន Delta នៃវីរុស COVID-19 បានឆ្លងរាលដាលនៅក្នុងប្រទេស។ នៅទីក្រុងហូជីមិញ ជាទីក្រុងធំបំផុត និងរងផលប៉ះពាល់ខ្លាំងបំផុតពីការផ្ទុះឡើងវីរុស COVID-19 មនុស្សពេញវ័យជាង ៩៥% បានចាក់វ៉ាក់សាំងលើកដំបូង។
ទោះយ៉ាងណាមនុស្សជាច្រើនត្រូវរង់ចាំលើកទី២ ទោះបីជាពេលវេលាសម្រាប់ពួកគេចាក់វ៉ាក់សាំងត្រូវកន្លងហួសក៏ដោយ។ បច្ចុប្បន្នប្រទេសនេះកំពុងប្រើប្រាស់វ៉ាក់សាំង AstraZeneca, Pfizer, Moderna និង Vero Cell។ ប្រទេសវៀតណាមបានកត់ត្រាអ្នកឆ្លងថ្មីនៃវីរុស Covid-19 ចំនួន ១១.១៧២នាក់គិតត្រឹមល្ងាចថ្ងៃចន្ទ ដែលនាំឲ្យចំនួនអ្នកឆ្លងសរុបនៅប្រទេសនេះកើនឡើងដល់ ៦២៤.៥៤៧នាក់ និងអ្នកស្លាប់សរុបចំនួន ១៥.៦៦០នាក់បន្ទាប់ពីបានកត់ត្រាឣ្នក ស្លាប់ថ្មីចំនួន ២៨៩នាក់៕
អត្ថបទ៖ ប៊ុន ថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
