យោងតាមសារព័ត៌មានពាក់កណ្តាលផ្លូវការរបស់អ៊ីរ៉ង់ បានរាយការណ៍កាលពីថ្ងៃពុធ ដោយដកស្រង់ពីប្រភពសន្តិសុខ ដែលបានផ្តល់ដំណឹងអំពីលទ្ធផលនៃការស៊ើបអង្កេតចុងក្រោយថា ការធ្លាក់ឧទ្ធម្ភាគចក្រ ដែលអតីតប្រធានាធិបតីអ៊ីរ៉ង់ លោក Ebrahim Raisi បានស្លាប់កាលពីខែឧសភា គឺបណ្តាលមកពីស្ថានភាពអាកាសធាតុ និងអសមត្ថភាពរបស់យន្តហោះដើម្បីគ្រប់គ្រងទម្ងន់ដែលវាកំពុងផ្ទុក។

ប្រព័ន្ធផ្សព្វផ្សាយរដ្ឋបានរាយការណ៍ថា មជ្ឈមណ្ឌលទំនាក់ទំនងរបស់នាយសេនាធិការនៃកងកម្លាំងប្រដាប់អាវុធ ដែលទទួលខុសត្រូវក្នុងការផ្សព្វផ្សាយព័ត៌មានស្តីពីការស៊ើបអង្កេតការធ្លាក់យន្តហោះបាននិយាយថា របាយការណ៍គឺ «មិនពិតទាំងស្រុង»។

របាយការណ៍បឋមរបស់យោធាអ៊ីរ៉ង់ បាននិយាយកាលពីខែឧសភាថា គ្មានភស្តុតាងនៃឃាតកម្ម ឬការវាយប្រហារណាមួយ ត្រូវបានរកឃើញក្នុងអំឡុងពេលស៊ើបអង្កេតនោះទេ។ ប្រភពសន្តិសុខ ដែលមិនបញ្ចេញឈ្មោះបាននិយាយថា «ការស៊ើបអង្កេតនៅក្នុងករណីធ្លាក់ឧទ្ធម្ភាគចក្ររបស់ លោក Ayatollah Raisi ត្រូវបានបញ្ចប់ ដែលមានភាពប្រាកដប្រជាពីអ្វីដែលបានកើតឡើង គឺជាឧបទ្ទវហេតុ»។

ប្រភពព័ត៌មានបាននិយាយថា មូលហេតុចំនួនពីរនៃឧបទ្ទវហេតុនេះត្រូវបានកំណត់ គឺជាស្ថានភាពអាកាសធាតុមិនអំណោយផល និងឧទ្ធម្ភាគចក្រមិនអាចផ្ទុកទម្ងន់បាន ដែលនាំឱ្យវាធ្លាក់នៅតំបន់ភ្នំមួយកន្លែង។

ការស៊ើបអង្កេតបង្ហាញថា ឧទ្ធម្ភាគចក្រនេះផ្ទុកមនុស្សលើសពីរនាក់ហួសពីសមត្ថភាពដែលពិធីសារសន្តិសុខ អនុញ្ញាត។